މަޝްހޫރު ކޮލީން ހޫވާގެ ފޮތް "ވެރިޓީ"ގެ މައްޗަށް ބިނާކޮށް ހަދާ ފިލްމުގެ ތަރިން އިއުލާންކޮށްފި އެވެ.

އާންމުކޮށް ލޯބީގެ ވާހަކަތައް ލިޔާ ކޮލީގެ ހޫވާގެ "ވެރިޓީ"އަކީ އޭނާ ފުރަތަމަ ފަހަރަށް ލިޔުނު ސައިކޮލިޖިކަލް ތްރިލާއެކެވެ.

މި ފޮތަށް ބިނާކޮށް ފިލްމެއް ހަދަން އެމެޒަން އެމްޖީއެމް ސްޓޫޑިއޯއިން ވަނީ ނިންމާފަ އެވެ. އަދި މި ފިލްމުގެ ލީޑް ތަރިންގެ ގޮތުގައި ފެންނާނީ އެން ހަތަވޭ، ޑަކޯޓާ ޖޮންސަން އަދި ޖޯޝް ހާނެޓް ކަމަށް ވަނީ އިއުލާންކޮށްފަ އެވެ.

މި ފިލްމުގައި ވާހަކަ ލިޔުންތެރިއެއް ކަމަށްވާ ވެރިޓީ ކުއްލިއަކަށް އެކްސިޑެންޓްވެ ބަލި އެނދުގައި އޮންނަން ޖެހުމުން އޭނާ ލިޔަން ފަށާފައިވާ ފޮތްތައް ނިންމުމަށް ވެރިޓީގެ ފިރިމީހާ އެހެން ލިޔުންތެރިއެއް ހޯދަ އެވެ. މި ވާހަަކައަކީ މި ލިޔުންތެރިޔާ ލޯވަންއަށް ވެރިޓީގެ މަސައްކަތްތައް ނިންމަން އުޅުމުގެ ތެރޭގައި ދިމާވާ އާދާޔާހިލާފު ކަންކަމުގެ ވާހަކައެކެވެ.

"ވެރިޓީ" އަކީ ފިލްމަށް ހަދާ ކޮލީން ހޫވާގެ ދެވަނަ ފޮތެވެ. ކޮލީންގެ ވާހަކައަކަށް ބިނާކޮށް ހަދާފައިވާ "އިޓް އެންޑްސް ވިތް އަސް" އަށް ވަނީ ބެލުންތެރިންގެ ބޮޑު ތަރުހީބެއް ލިބިފަ އެވެ.