ސްކޫލް ދަތުރެއްގައި ރާއްޖެ އައިސް އުޅެނިކޮށް މިދިޔަ މަހު މަރުވި ސިންގަޕޫރު ދަރިވަރު ޖެނާ ޗަންގެ މައްސަލައިގައި ގާނޫނީ ވަކީލުންގެ ފީ ދެއްކުމަށާއި އެކަމަށް ބޭނުންވާ މާލީ އެހީތެރިކަން ހޯދުމަށް ގޯފަންޑްމީ ކެމްޕޭނެއް ފަށައިފި އެވެ.

ނޮވެމްބަރު 8 ގައި 15 އަހަރުގެ ޖެނާ މަރުވީ އިނގިރޭސިވިލާތުގައި ރަޖިސްޓަރީކޮށްފައިވާ ޗެރިޓީއެއް ކަމަށްވާ މޯލްޑިވްސް ވޭލް ޝާކް ރިސާޗް ޕްރޮގްރާމް (އެމްޑަބްލިއުއެސްއާރްޕީ)ގެ ދިރާސާ ދަތުރެއްގައި އެހީތެރިވަމުން ދަނިކޮށް ސްނޯކްލިން ކުރުމުގައި ދިމާވި ހިތާމަވެރި ހާދިސާއެއްގަ އެވެ.

ޖެނާ މޫދަށް އެރި އުޅެނިކޮށް މަރުވެފައިވަނީ އެމީހުން ދަތުރު ދިޔަ ދޯނީގެ ބުރަފަތީގައި ޖެހި ވަރަށް ބޮޑަށް އަނިޔާވެގެނެވެ.

އިނގިރޭސިވިލާތާއި ސިންގަޕޫރަށް ނިސްބަތްވާ ޖެނާއަކީ ސެންޓް ޖޯސެފްސް އިންޓަނޭޝަނަލް އިންސްޓިޓިއުޝަންގެ ދަރިވަރެކެވެ.

ކުއްޖާގެ އާއިލާއިން އެ ކުއްޖާގެ މަރުގެ ތަހުގީގާއި މެދު ކަންބޮޑުވުން ފާޅުކޮށްފައިވެ އެވެ. އޭނާގެ މައިންބަފައިން ބުނެފައި ވަނީ މި ހިތާމަވެރި ހާދިސާ ހިނގިތާ އެއް މަސް ވީއިރުވެސް އެ ހާދިސާއާ ގުޅޭގޮތުން އުފެދިފައިވާ ސުވާލުތަކަށް ދިވެހި ފުލުހުންގެ ފަރާތުން ޖަވާބު ނުލިބޭ ކަމަށެވެ.

އެ އާއިލާއިން ބުނިގޮތުގައި ޖެނާގެ ހަށިގަނޑުގެ ޕޯސްޓް-މޯޓަމް އެގްޒެމިނޭޝަން ވެސް ރާއްޖެއިން ހަދާދީފައިނުވާ ކަމަށެވެ.

އެމީހުން ގަބޫލުކުރާ ގޮތުގައި އެ ހާދިސާއާ ގުޅޭގޮތުން ފުރިހަމަ ތަހުގީގެއް ކުރެވިފައެއް ނުވެ އެވެ. އަދި އެ އެކްސްކާޝަންގައި އިހުމާލުތަކެއްވާ ކަމަށް އާއިލާއިން ތުހުމަތުކުރެ އެވެ.

ހާދިސާއާ ގުޅޭގޮތުން ހޭލުންތެރިކަން އިތުރުކުރުމަށާއި އެ އާއިލާއިން ޖަވާބު ހޯދުމަށް ކުރާ މަސައްކަތުގައި ގާނޫނީ ހަރަދުތަކަށް އެހީތެރިވުމަށް ގޯފަންޑްމީ ކެމްޕޭނެއް ވަނީ ފަށައިފަ އެވެ. މި ކެމްޕޭނުގައި ޖެނާގެ ކުއްލި މަރަށް މަގުފަހިވި ހާލަތްތަކާއި އެ ކުންފުނީގެ އިހުމާލާ ގުޅިގެން މިކަމުގައި އެންމެން އަޑުއުފުލައިދިނުމަށް އާއިލާއިން ވަނީ އެދިފަ އެވެ.

އެ އާއިލާއިން ބުނާ ގޮތުގައި، ކުއްޖާ މަރުވިއިރު، އޭނާއާއެކު ތިބި މުދައްރިސުންނާއި ދަރިވަރުންގެ އެއްވެސް ހެކިބަހެއް މިވީހާތަނަށް އާއިލާއަށް އަންގާފައި ނުވެ އެވެ.

މި ހާދިސާގެ ސަބަބުން ޖެނާގެ އާއިލާއާއި އޭނާއާއެކު އެ ދަތުރުގައި ބައިވެރިވި ޖެނާގެ އެކުވެރި ދަރިވަރުން ތިބީ ޝޮކެއްގައި ކަމަށް ވެސް އާއިލާއިން ވަނީ ބުނެފަ އެވެ.

"އަހަރެމެންގެ އާއިލާއަށާއި ލޯބިވާ މީހުންނަށް މި އުނދަގޫ ވަގުތުގައި އެހީތެރިވެދީ، ޖެނާގެ މައްސަލައާ ބެހޭގޮތުން އަޑުއުފުލައި ދިނުން އެދެން،" އާއިލާއިން ބުނެފައިވެ އެވެ.

މި ކެމްޕޭނުން ލިބޭ ހުރިހާ ފައިސާއެއް ދާނީ މިފަދަ ނުރައްކާތެރި ހާދިސާތަކުން ކުޑަކުދިންނާއި ފަތުރުވެރިން ރައްކާތެރިކުރުމަށްޓަކައި ކުރެވޭ މަސައްކަތަށް ކަމަށް އާއިލާއިން ބުނެ އެވެ. މިފަދަ މައްސަލަތައް ބެލުމަށް ވަކީލުންނަށް ގާނޫނީ ފީތަކާއި މާލީ އެހީތެރިކަން ފޯރުކޮށްދިނުމަށް ހަރަދުކުރުމަށް ވެސް ވަނީ ނިންމާފަ އެވެ.

ގާނޫނީ ފީ ދެއްކުމަށް ބޭނުންވާ 10،000 ޕައުންޑްގެ ތެރެއިން މިހާތަނަށް 4،600 ޕައުންޑް ހޯދިފައިވާ ކަމަށް އާއިލާއިން ބުނެ އެވެ.

ސިންގަޕޫރުގެ ފޮރިން މިނިސްޓްރީގެ ތަރުޖަމާނަކު ބުނެފައިވާގޮތުގައި އެ އޮފީހުން ދަނީ ޖެނާގެ މަރުގެ މައްސަލައިގައި އާއިލާއަށް އެހީތެރިކަން ފޯރުކޮށްދިނުމާއެކު، ރާއްޖޭގެ އިދާރާތަކާ ވާހަކަދައްކަމުން ދާކަމަށެވެ.

ޖެނާގެ ހަށިގަނޑު ވަނީ ނޮވެމްބަރު 15 ވަނަ ދުވަހު ސިންގަޕޫރުގައި ވަޅުލާފަ އެވެ.