އިންޑިއާގެ އޮޑިއާގެ 40 މަސައްކަތްތެރިން ރާއްޖެ ގެނެސް މުސާރަ ނުދީ ހާލުގައި ޖެއްސި މަސައްލައެއް އިންޑިއާގެ ނޫސްތަކުން ރިޕޯޓްކޮށްފި އެވެ.

ޔޫޓިއުބްގައި އާއްމުވެފައިވާ މި މަސައްކަތްތެރިންގެ ވީޑިއޯއަކާއި ހަވާލާދީ އިންޑިއާގެ ބައެއް ނޫސްތަކުން ރިޕޯޓްކޮށްފައިވާ ގޮތުގައި ކޮންސްޓްރަކްޝަން މަސައްކަތް ކުރާ އަމިއްލަ ކުންފުންޏަކުން އެ މީހުން ރާއްޖެ ގެނެސް، މުސާރަ އާއި އަސާސީ ހިދުމަތްވެސް ފޯރުކޮށް ނުދީ ގެންގުޅޭކަމަށް ތުހުމަތުކޮށްފައިވެ އެވެ.

އާއްމުވެފައިވާ ވީޑިއޯގައި އެމީހުން ވަނީ އެނބުރި ގައުމަށް ގެންގޮސްދޭން އިންޑިއާ ސަރުކާރުގައި އެދިފަ އެވެ.

އިންޑިއާގެ ނޫސްތަކުން ބުނެފައިވާ ގޮތުގައި ކޮންސްޓްރަކްޝަން ސައިޓުގައި އެ 40 މީހުން ތިބީ ވަރަށް ހާލުގަ އެވެ. އެ ތަނުން ކަރަންޓުގެ ހިދުމަތް ވެސް ކަނޑާލާފައިވާ ކަމަށް ބުނެފައިވެ އެވެ.

އެ މަސައްކަތްތެރިން ރާއްޖެ ގެނެސްފައިވަނީ މި އަހަރުގެ ޖޫން އަދި ޖުލައިގައި ކަމަށާއި ރަނގަޅު ވަޒީފާގެ ފުރުސަތެއް ކަމަށް ބުނެ އެޖެންޓެއް މެދުވެރިވެގެން ރާއްޖެ އައުމަށް ފަހު އެތައް މަހެއް ވީއިރު މުސާރަ ނުދޭ ކަމަށް އެ މީހުން ބުނެފައިވެ އެވެ.

އެ މަސައްކަތްތެރިންގެ ގުރޫޕުގައި ހިމެނޭ މީހެއްގެ މަންމައާ ހަވާލާދީ ޓައިމްސް އޮފް އިންޑިއާގައި ބުނީ، ރާއްޖެ އައި ފަހުން އެ މީހުންނަށް މުސާރަ ލިބިފައިވަނީ އެންމެ މަހަކު ކަމަށެވެ.

ރާއްޖޭގައި ހާލުގައި ޖެހިފައިވާ މަސައްކަތްތެރިންގެ އާއިލާތަކުން ދަނީ އިންޑިއާގެ އިދާރާތަކުގެ ސަމާލުކަމަށް މިކަން ގެނައުމަށް މަސައްކަތް ކުރަމުންނެވެ. އެ ގޮތުން ޗަތުރަޕޫރު އަވަށުގެ ގިނަ ބަޔަކު މީގެ ތެރޭ ހިމެނޭއިރު، އެ މީހުންގެ އާއިލާތަކުން ވަނީ އެ ސަރަހައްދުގެ ޑިސްޓްރިކްޓް ލޭބާ އޮފިސަރާ ބައްދަލުކޮށް، ކަންބޮޑުވުންތައް ހިއްސާކޮށްފަ އެވެ. އެ ކަންބޮޑުވުންތައް ސަރުކާރުގެ ކަމާ ބެހޭ ފަރާތްތަކާ ހަމައަށް ގެންގޮސްދޭނެ ކަމުގެ ޔަގީންކަން ދީފައިވާ ކަމަށް ޑިސްޓްރިކްޓު ލޭބާ އޮފިސަރު ވަނީ ވިދާޅުވެފަ އެވެ.

އެ މީހުން ރާއްޖެ ގެނައީ ކޮން ކުންފުންޏަކުން ކަމެއް ސާފެއް ނުވެ އެވެ.