ސީރިޔާގެ ހަޔާތު ތަހްރީރް އަލް ޝާމް (އެޗްޓީއެސް) ޖަމާއަތަކީ ޓެރަރިސްޓް ޖަމާއަތެއް ކަމަށް ރާއްޖެ އިން ކަނޑައަޅާފައި އޮތް އޮތުން ހަތަރުވަނަ ފަހަރަށް ދަމަހައްޓައިފި އެވެ.

ދިވެހި ސަރުކާރުން މިއަދު އާންމުކުރި ޓެރަރިސްޓް ޖަމާއަތްތަކުގެ ލިސްޓުގައި، ސީރިއާގައި މިހާރު ވެރިކަން ކުރަމުންދާ އެޗްޓީއެސް ހިމެނިފައިވެ އެވެ. މިއީ 2019 އިން ފެށިގެން ކޮންމެ އަހަރަކުވެސް މި ޖަމާއަތް އެ ލިސްޓުގައި ހިމެނެމުން އަންނަތާ ހަތަރުވަނަ އަހަރެވެ.

އެޗްޓީއެސްއަކީ ސީރިއާގެ ކުރީގެ ރައީސް ބައްޝާރުލް އަސަދުގެ ވެރިކަން ބަދަލުކުރުމަށްފަހު އެ ޤައުމުގެ ބައެއް ސަރަހައްދުތަކުގެ ބާރު ހިފާފައިވާ ހަނގުރާމަވެރި ޖަމާއަތެކެވެ. މި ޖަމާއަތަކީ އދ. ގެ ސަލާމަތީ މަޖިލީހުންނާއި އެމެރިކާ އަދި އިނގިރޭސިވިލާތް ފަދަ ގިނަ ޤައުމުތަކުން ޓެރަރިސްޓް ޖަމާއަތެއްގެ ގޮތުގައި ކަނޑައަޅާފައިވާ ޖަމާއަތެކެވެ.

ރާއްޖޭގެ މި އަހަރުގެ ލިސްޓުގައި ސީރިއާއަކީ ހަނގުރާމަވެރި ސަރަހައްދެއްގެ ގޮތުގައި ހިމަނާފައިވާކަންވެސް ފާހަގަކުރެވެ އެވެ. މިއީވެސް 2019 އިން ފެށިގެން ދަމަހައްޓަމުން އަންނަ ނިންމުމެކެވެ.

ޓެރަރިޒަމް މަނާކުރުމުގެ ޤާނޫނުގެ ދަށުން، ޓެރަރިސްޓް ޖަމާއަތްތަކަށް ތާއީދުކުރުމާއި، އެފަދަ ޖަމާއަތްތަކުގެ ލިޔެކިޔުންތައް ހިއްސާކުރުމާއި، އެފަދަ ޖަމާއަތްތަކުގައި ބައިވެރިވުމަކީ މަނާކަމެކެވެ. އަދި ހަމައެހެންމެ ހަނގުރާމަވެރި ސަރަހައްދުތަކަށް ދިއުމާއި ރާއްޖެއިން ބޭރުގައި ހިނގާ ހަނގުރާމަތަކުގައި ބައިވެރިވުންވެސް މަނާކުރެ އެވެ.

ޤައުމީ ސަލާމަތާބެހޭ މަޖިލީހުގެ ލަފާގެ މަތިން، ޓެރަރިސްޓް ޖަމާއަތްތަކުގެ ލިސްޓު އެކުލަވާލުމާއި އެ ލިސްޓަށް ބަދަލު ގެނައުމުގެ އިޚްތިޔާރު ލިބިގެންވަނީ ރައީސުލްޖުމްހޫރިއްޔާއަށެވެ.