ކުރީގެ ނައިބު ރައީސް އަހުމަދު އަދީބު ދައުލަތައް ދައްކަންޖެހޭ އެއް މިލިއަން ރުފިޔާ އެއް މަސްދުވަހުގެ ތެރޭގައި ދައްކަން ސިވިލް ކޯޓުން އިއްޔެ ހުކުމް ކޮށްފި އެވެ.

އެ ޖޫރިމަނާއަކީ އެމްއެމްޕީއާރުސީގެ ހިޔާނާތުގެ މައްސަލައިގައި އަދީބުގެ މައްޗަށް 20 އަހަރުގެ ޖަލު ހުކުމާއެކު، ދެ މިލިއަން ރުފިޔާއިން ދެއްކުމަށް ކޮށްފައިވާ ހުކުމާގުޅިގެން ދައްކަންޖެހޭ ޖޫރިމަނާ އެވެ.

އެ ފައިސާ މިއަދާ ހަމައަށް ދައްކާފައިނުވާތީ، އެ މައްސަލަ ކޯޓަށް ހުށަހެޅީ ދައުލަތުންނެވެ.

އަދީބުގެ ގާނޫނީ ވަކީލު ބުނެފައިވަނީ އެއްފަހަރާ އެ ފައިސާ ދެއްކުމަކީ ދަތިކަމެއް ކަމަށެވެ. އެ ގޮތުން ފައިސާ ދެއްކުމަށް ބޭނުންވާ ގޮތް ލިޔުމުން އެޓާނީ ޖެނެރަލްގެ އޮފީހަށް ހުށަހެޅުމަށް ޓަކައި ހަތް ދުވަހުގެ ފުރުސަތަކަށް އެދުނެވެ. ނަމަވެސް ދައުލަތުން އެ ކަމަށް އެއްބަސްނުވުމުން މައްސަލަ ނިންމަވާއިރު، ޝަރީއަތުގެ އަޑުއެހުމަކާ ނުލައި ހުކުމްކޮށްދިނުމަށް އެދިފައިވެ އެވެ.

ސިވިލް ކޯޓުން ހުކުމްކުރީ ދައުލަތުން އެދުނުގޮތަށް އެއް މަސް ދުވަސްތެރޭގައި އަދީބު ދައުލަތަށް އެއް މިލިއަން ރުފިޔާ ދައްކައި ޚަލާސް ކުރުމަށެވެ.

20 އަހަރުގެ ޖަލު ހުކުމެއް ކޮށްފައި ވީނަމަވެސް އަދީބު މިހާރު ދިރިއުޅުއްވަނީ ރާއްޖެއިން ބޭރުގަ އެވެ. އޭނާ ރާއްޖެއިން ބޭރަށް ބޭސް ފަރުވާއަށް ފޮނުވާފައިވަނީ ކުރީ ސަރުކާރުންނެވެ.