މުޅި ރާއްޖެއަށް މިހާރު ކުރަމުންދާ ވިއްސާރައިގައި ބޯކޮށް ވާރޭވެހި އުދަ އެރުމުގެ ސަބަބުން ހަ ރަށެއްގައި ފެންބޮޑުވެއްޖެ އެވެ.

ފެން ބޮޑުވި ކަމުގެ ރިޕޯޓް ހަ ރަށަކުން ލިބިފައިވާ ކަމަށާއި ފެން ހިންދުމަށް ސިފައިން ހަރަކާތްތެރިވަމުން އަންނަ ކަމަށް ނޭޝަނަލް ޑިޒާސްޓާ މެނޭޖުމަންޓް އޮތޯރިޓީ (އެމްޑީއެމްއޭ) އިން މިއަދު ވަނީ ބުނެފަ އެވެ.

ފެން ބޮޑުވެފައިވަނީ ފ. ނިލަންދު އާއި ފ. މަގޫދޫ، ދ. ކުޑަހުވަދޫ އަދި ދ. މީދޫގައި ކަމަށް އެމްޑީއެމްއޭ އިން ބުންޏެވެ. އެ އޮތޯރިޓީން ބުނީ އުދައަރައި އެންމެ ބޮޑަށް ގެއްލުންވީ އެ ހަ ރަށުގެ ތެރެއިން ށ. ނަރުދޫއަށް ކަމަށެވެ.

ށ. ނަރުދޫއަށް ވަނީ އުދަ އަރައި ބޮޑު ސަރަހައްދެއްގައި ފެން ބޮޑުވެފައި

ނަރުދޫއަށް އުދަ އެރުމުގެ ސަބަބުން އެ ރަށުގެ ބޮޑު ސަރަހައްދެއްގައި ފެން ބޮޑުވެ 12 ވަރަކަށް ގެޔަށް ގެއްލުންވެފައިވެ އެވެ.

އެންޑީއެމްއޭއިން ބުނީ މީގެން އެއްވެސް ހާދިސާއެއްގައި ބޯހިޔާވަހިކަން ގެއްލި އިންސާނީ އެހީތެރިކަން ފޯރުކޮށްދޭން ޖެހިފައި ނުވާކަމަށެވެ.

ފެން ބޮޑުވުމުގެ ސަބަބުން ސިފައިންނާއި ރަށުގެ ރައްޔިތުން ނުކުމެ ފެން ހިންދުމުގެ މަސައްކަތް ކުރަނީ

އަންނަ އާދިއްތަ ދުވަހާ ހަމައަށް މޫސުން ގޯސް ވާނެ ކަމަށް މޫސުމާ ބެހޭ އިދާރާއިން ވަނީ ލަފާކޮށްފަ އެވެ. އެ އިދާއާއިން ބުނީ މިހާރު ކުރަމުންދަނީ އިރުވައި މޫސުމުގެ ހަޅައިގެ އަސަރު ކަމަށެވެ.