ސްޓާ ޕްލަސްއިން ދުރަށް ދައްކާ މަގުބޫލު ހިންދީ ސީރީޒް "އަނުޕަމާ"ގެ ލީޑު ތަރި ރުޕާލީ ގަންގޫލީ އެ ޝޯއިން ވަކި ކުރަން އުޅޭ ކަމަށް ހަބަރުތައް ބުނެފި އެވެ.

ދާދި ފަހުން އަނޫޕަމާގެ ބައެއް އެހެން ތަރިން ޝޯއިން ވަކިކޮށް އޭގެ ބަދަލުގައި އެހެން ތަރިން ތައާރަފް ކޮށްފައިވާއިރު އެ ބަދަލު ގެނައުމުގެ ފަހަތުގައި ވަނީ ރުޕާލީ ކަމަށް ބުނެވެ އެވެ.

އެ ޝޯގައި މީގެ ކުރިން ފެނިގެންދިޔަ ބައެއް ތަރިން ކަމަށްވާ ނިދީ ޝާހް، ސުދާންޝޫ ޕާންޑޭ އަދި ޕަރަސް އަހްލާވަތު ފަދަ ތަރިން ވެސް ވަނީ އެ ތަރިން ޝޯ ދޫކޮށް ދިޔައީ ރުޕާލީގެ ސަބަބުން ކަމަށް ބުނެފަ އެވެ. އެގޮތުން ރުޕާލީ އެ ތަރިންނާމެދު ވަރަށް އިހާނެތިކޮށް ކަންތައް ކުރާ ކަމަށާއި އޭނާގެ ސަބަބުން އެހެން ތަރިންނަށް އެކަށީގެންވާ ސަމާލުކަން ޕްރޮޑިއުސަރުން ނުދޭ ކަމަށް ވެސް ހަބަރުތައް ބުނެ އެވެ.

ރުޕާލީގެ ސަބަބުން ޝޯއަށް އެތައް ގެއްލުމެއް ލިބެމުން އަންނާތީ އޭނާ ޝޯއިން ވަކިކޮށް އެހެން ތަރިއެއް އޭނާގެ ބަދަލުގައި ބޭނުންކުރަން ޕްރޮޑިއުސަރުން ނިންމާފައިވާ ކަމަށް ބުނާ ވީޑިއޯއެއް މިހާރު ދަނީ ދައުރުވަމުންނެވެ. މިކަމާ ގުޅިގެން ރުޕާލީގެ ބަދަލުގައި އަނޫޕަމާގެ ރޯލަށް ގެންނަން ހަމަޖެހިފައިވަނީ ތަޖުރިބާކާރު އެކްޓަރު ސަމްބާވްނާ ސެތު ކަމަށް ހަބަރުތައް ބުނެ އެވެ.

ރާޖަން ޝާހީ ޕްރޮޑިއުސްކުރާ އަނޫޕަމާއަކީ ހިންދީ ސީރިއަލްތަކުގެ ޓީއާރްޕީ ޗާޓުގައި އެތައް ހަފްތާތަކެއް އެއްވަނައިގައި އޮތް ކާމިޔާބު ޝޯއެކެވެ.