އަލިފާނުގެ ހާދިސާއަކުން އެތައް ބައެއްގެ ދިރިއުޅުން ގެއްލި މިހާ ބޮޑު ގެއްލުމެއް ލިބޭ ދުވަހެއް ފެނިދާނެ ކަމަށް ހީވެސް ނުކުރާ ކަމަށް ބޮލީވުޑްގެ އެކްޓަރު ޕްރިތީ ޒިންތާ ބުނެފި އެވެ.

ޕްރިތީ މިހެން ބުނެފައިވަނީ އެމެރިކާގެ ލޮސް އެންޖެލަސްގައި މިހާރު ރޯވެފައިވާ އަލިފާންތަކާ ބެހޭގޮތުން އެކްސް މެދުވެރިކޮށް ކުރި ޓްވީޓެއްގަ އެވެ.

2016 ވަނަ އަހަރު އެމެރިކާގެ ވިޔަފާރިވެރިއެއް ކަމަށްވާ ޖީން ގުޑްއިނަފްއާ ކައިވެނި ކުރި ޕްރިތީ އޭނާގެ ފިރިމީހާއާއި އެއްމާބަނޑު ދެ ދަރިންނާއެކު ދިރިއުޅެނީ ވެސް ލޮސް އެންޖެލަސްގަ އެވެ.

ޕްރިތީ އިތުރަށް ބުނީ އަލިފާނުގެ ނުރައްކަލުން އޭނާއާއި އޭނާގެ އާއިލާ ސަލާމަތުން ތިބި ކަމަށާއި އެހެން ނަމަވެސް އޭނާގެ ވަށައިގެން ފެންނަ މަންޒަރުތަކުން ހިތްދަތިވާ ކަމަށެވެ.

"މި ކާރިސާއިން އަރައިގަންނަން ރެއާދުވާލު މަސައްކަތް ކުރަމުން އަންނަ ފަޔާފައިޓަރުންނަށް ހިތުގެ އަޑިން ޝުކުރު އަދާ ކުރަން" ޕްރިތީ ބުންޏެވެ.

2000ގެ އަަހަރުތަކުގައި ބޮލީވުޑްގެ ގިނަ ފިލްމުތަކަކުން ފެނިގެންދިޔަ ޕްރިތީ ދެން އެންމެ އަވަހަށް ފެންނާނީ ސަނީ ޑިއޯލްއާއެކު "ލާހޯރް 1947"އިންނެވެ.