ޑިޒްނީގެ މަޝްހޫރު އެނިމޭޓަޑް ފިލްމު "މޯނާ"ގެ ކޮޕީ ރައިޓްސް މައްސަލައެއްގައި އެނިމޭޓަރަކު އެ ކުންފުންޏާ ދެކޮޅަށް ދައުވާ ކޮށްފި އެވެ.

ބަކް ވުޑެލް ކުރި އެ ދައުވާގައި އޭނާ ބުނެފައިވަނީ ޑިޒްނީއިން އޭނާގެ ސްކްރިޕްޓެއް ކަމަށްވާ "ބަކީ ދަ ވޭވް ވޯރިއާ"ގެ ހިޔާލުތައް ވަގަށް ނަގާފައިވާ ކަމަށެވެ. އަދި "މޯނާ"ގެ ވާހަކައާއި އެ ސްކްރިޕްޓްގައި ހައިރާންވާހާ ގިނަ އެއްގޮތް ކަންތައްތައް ހުރި ކަމަށް ވެސް ބަކް އޭނާގެ ދައުވާގައި ބުނެފައިވެ އެވެ.

އޭނާ ބުނާ ގޮތުގައި އެ ދެ ވާހަކައަކީ ވެސް މައިންބަފައިންގެ ބަސްނާހާ އަމިއްލައަށް ގެއިން ނުކުމެ ދަތުރެއް ފަށާ ފުރާވަރު ކުއްޖެއްގެ ދަތުރު ގެނެސްދޭ ވާހަކަ އެކެވެ.

ބަކް އިތުރަށް ބުނީ އެ ޚިޔާލަކީ މީގެ އެތައް އަހަރެއް ކުރިން އޭނާ މަސައްކަތްކުރި މެންޑެވިލް ފިލްމްސްއާ ހިއްސާކުރި ހިޔާލެއް ކަމަށާއި ޑިޒްނީއަށް އެހިޔާލު ހުށައެޅީ އެ ކުންފުނިން ކަމަށެވެ.

މި ސަބަބުތަކަށްޓަކައި ބަކް ވަނީ އޭނާއަށް ލިބުނު ގެއްލުމުގެ ބަދަލުގައި 10 ބިލިއަން އެމެރިކާ ޑޮލަރު ހޯދަން ކެލިފޯނިއާގެ ކޯޓުގައި އެދިފަ އެވެ.

ބަކްގެ މި ދައުވާއަށް ޑިޒްނީއިން ވެސް އަދި މެންޑެވިލްއިން ވެސް ވަކި ރައްދެއް މިހާތަނަށް ދީފައިނުވާ ކަމަށް ހަބަރުތައް ބުނެ އެވެ.