ވިލުފުށީ މިސްކިތުގައި ބަޔަކު ކުޅިވަރު ކުޅޭ ވީޑިއޯއެއް އާންމުވެއްޖެ

ވިލުފުށީ މިސްކިތުގެ ތެރޭގައި ބަޔަކު ކުޅިވަރު ކުޅޭ ވީޑިއޯއެއް އާންމުވުމާއެކު ފާޑުކިޔުން އަމާޒުވެއްޖެ އެވެ.

ސޯޝަލް މީޑިއާގައި ދައުރުވަމުންދާ ވީޑިއޯއަކުން ފެންނަ ގޮތުން މިސްކިތުގެ އެތެރެ ކަމަށް ބެލޭވޭ ތަނެއްގައި ދެ ޖިންސްގެ މީހުން މަސްހުނިކޮށް ކޮންމެވެސް ގޭމެއް ކުޅެމުންގެންދެ އެވެ.

މި ވީޑިއޯއާއެކު ގިނަ ބަޔަކު ދަނީ ފާޑު ކިޔަމުންނެވެ. އެގޮތުން މިސްކިތުގެ ހުރުމަތް ކެނޑޭގޮތަށް އެފަދަ ކަންކަން ކުރުމަކީ ބަލައިގަނެވޭނެ ކަމެއް ނޫންކަމަށް މީހުން ބުނެފައިވެ އެވެ.

"ހުރިހާ" އާ ވާހަކަދެއްކި ވިލުފުށީ މީހަކު ބުނީ އެ ރަށު މިސްކިތް ހަދާފައި ހުންނަނީ ތިރީގައި ކޮންފަރެންސް ހޯލަކަށް ބޭނުންކުރެވޭ ގޮތަށް ކަމަށާއި، ނަމާދުކުރަނީ މަތީ ފްލޯގައި ކަމަށެވެ. އެހެންކަމުން އެކި ކަހަލަ ހަފްލާތަކާއި ތައުލީމީ ދާއިރާގެ ބައްދަލުވުންތަކަށް އެތަން ބޭނުން ކުރާ ކަމަށެވެ.

ވީޑިއޯ އަކީ މިދިޔަ އަހަރުގެ ޓީޗަރުންގެ ދުވަސް ފާހަގަކުރުމަށް ބޭއްވި ޑިނާނައިޓެއްގެ ތެރެއިން ބޭއްވި ބައެއް ހަރަކާތްތަކުގެ މަންޒަރުކަމަށް އޭނާ ބުންޏެވެ.

މިކަމާ ގުޅިގެން އިސްލާމިކް މިނިސްޓަރު މުހައްމަދު ޝަހީމް އަލީ ސައީދު ވިދާޅުވީ މިސްކިތެއް ކަމަށް ބެލެވޭ ތަނެއްގައި މިސްކިތެއްގެ ޤަދަރާއި އިހުތިރާމާ ނުގުޅޭ ކަންތައްތަކެއް ކުރާތަން ފެންނަ ވީޑިއޯގެ މައްސަލަ ވަނީ ސަމާލުކަމަށް އައިސްފައި ކަމަށެވެ. މިއީ ކިހިނެއް ހިގާފައިވާ ކަމެއްތޯ ބެލުމުގެ ކަންކަން މިނިސްޓްރީ އިން ފަށާފައިވާ ކަމަށް ވެސް މިނިސްޓަރު ވިދާޅުވި އެވެ.

"މިސްކިތްތަކުގެ ޙުރުމަތް ކަނޑާ ފަރާތްތަކަށް ދީނީ އެއްބައިވަންތަކަން ޙިމާޔަތްކުރުމުގެ ޤާނޫނާއި ޤަވާޢިދުގެ ދަށުން ފިޔަވަޅު އަޅާނަން. އިންޝާ ﷲ" ޝަހީމް އެކްސްގައި ކުރެއްވި ޕޯސްޓުގައި ވިދާޅުވި އެވެ.

މިކަމާއި ގުޅިގެން ކުރިން ޖަމިޔަތުލް ސަލަފްގައި އިސްކޮށް އުޅުއްވި އަލީ ރަމީޒް ވިދާޅުވީ މިސްކިތަކީ ހުރުމަތްތެރިވެގެންވާ، ﷲ ގެ ގެކޮޅުތައް ކަމަށާއި އެތަންތަން ބިނާ ކުރެވިގެން ވާނީ ހަމައެކަނި ﷲ އަށް އަޅުކަން ކުރުމަށް ކަމަށެވެ.

އެތަނުގައި ހުރުމަތް ކެނޑޭފަދަ އެއްވެސް ކަމެއް ބަޔަކު ކޮށްފިނަމަ އެބަޔަކާ މެދު ހަރުކަށި ފިޔަވަޅު އަޅަން ޖެހޭނެކަމަށް އޭނާ ވިދާޅުވި އެވެ.

މި ނޫހުން އެ ރަށު ކައުންސިލްގެ ރައީސްގެ ބަހެއް ހޯދުމަށް ކުރި މަސައްކަތުން ފޯނަށް ޖަވާބު ނުދެއްވާތީ ވަނީ ބަހެއް ލިބޭގޮތް ނުވެފަ އެވެ.