އެމެރިކާގެ ލޮސް އެންޖެލަސްގެ އެކި ހިސާބުތަކުގައި ރޯވި އަލިފާންގަނޑު ތަކުގައި ހާލުގައި ޖެހުނު މީހުންނަށް އެހީވާން މިއުޒިކް ފެސްޓިވަލެއް ބާއްވަން ނިންމައިފި އެވެ.

ލޮސް އެންޖެލަސްގެ ހިލޭ ސާބަހަށް މަސައްކަތްކުރާ ޖަމިއްޔާއަކުން އިންތިޒާމުކުރާ މި މިއުޒިކް ފެސްޓިވަލްގައި މަޝްހޫރު ގިނަ ތަރިންތަކެއް ފެނިގެންދާނެ އެވެ. އޭގެ ތެރޭގައި ބިލީ އައިލިޝް، ލޭޑީ ގާގާ، ޖެލީ ރޯލް، ކޭޓީ ޕެރީ އަދި ލިލް ބޭބީ ފަދަ ފަންނާނުން ހިމެނޭނެ ކަަމަށް ހޮލީވުޑްގެ ހަބަރުތައް ބުނެ އެވެ.

މި ފެސްޓިވަލުން ލިބޭ އާމްދަނީ ހަދިޔާ ކުރަން ހަމަޖެހިފައިވަނީ އަލިފާންތަކުގައި ގެއްލުން ލިބުނު އާއިލާތަކަށް އަސާސީ އެހީ ފޯރުކޮށްދިނުމަށެވެ.

ލޮސް އެންޖެލަސްގެ އެކި ސަރަހައްދުތަކުގައި ރޯވެ އަނދަމުންދާތާ ދެހަފްތާ ވާން ގާތްވެފައިވާއިރު އަދިވެސް ބައެއް ސަރަހައްދުތަކުން އަލިފާންގަނޑު އެއްކޮށް ކޮންޓްރޯލް ކުރެވިފައެއް ނުވެ އެވެ.

އެ އަލިފާންތަކުގައި މަރުވި މީހުންގެ އަދަދު 25 ން މައްޗަށް އަރާފައިވާއިރު އެތައް ހާސް ބައެއްގެ ގެދޮރު ވަނީ އަނދާ އަޅިއަށް ވެފަ އެވެ.