ޣައްޒާގައި ކުރަމުންދިޔަ ހަނގުރާމަ ހުއްޓާލުމަށް އިޒްރޭލާއި ހަމާސްއިން ވީ އެއްބަސްވުމުގެ ދަށުން ޖަލުގައި ބަންދުކޮށްފައިތިބި ފަލަސްތީނުގެ 90 މީހުން ދޫކޮށްލައިފި އެވެ.

އޭގެ ކުރިން ހަމާސްއިން ވަނީ ހިފަހައްޓާފައި ތިބި 3 އިޒްރޭލު މީހުން ދޫކޮށްލާފަ އެވެ.

ޣައްޒާގެ ރައްޔިތުން މިހާރު އެނބުރި އެމީހުންގެ ގެތަކަށް ދަނީ އަންނަމުންނެވެ. އަދި ތިބީ އެމީހުންނަށް ބޭނުންވެފައިވާ ކާބޯތަކެއްޗާއި ޞިއްހީ އެހީތެރިކަމުގެ އިންތިޒާރުގަ އެވެ. މިއީ 15 މަސް ދުވަހަށްފަހު ޣައްޒާގެ ރައްޔިތުންނަށް ހަމަޖެހިލެވުނު ފުރަތަމަ ދުވަހެވެ.

ހަނގުރާމަ ހުއްޓާލުމުގެ އެއްބަސްވުމުގެ ފުރަތަމަ މަރުޙަލާގެ ދަށުން، ކޮންމެ ދުވަހަކު ޣައްޒާއަށް ވަންނާނެ ކަމަށް ވަޢުދުވެފައިވާ 600 އެހީގެ ޓްރަކުގެ ތެރެއިން ފުރަތަމަ ޓްރަކު މިހާރުވަނީ ވަދެފަ އެވެ.

ހަނގުރާމަ ހުއްޓާލުމުގެ އެއްބަސްވުމާއެކު، ޣައްޒާގައި ދަނީ އުފާފާޅު ކުރަމުންނެވެ. އެގޮތުން ޖަލުން މިނިވަން ކުރި މީހުން ރެޑް ކްރޮސްގެ ބަހުގައި ގެނައި އިރު، އެތައް ހާސްބަޔަކު އެތަނަށް އެއްވެ ވަނީ އުފާ ފާޅުކޮށްފަ އެވެ.

7 އޮކްޓޯބަރު 2023 އިން ފެށިގެން އިޒްރޭލުން ދެމުންދިޔަ ހަމަލާތަކުގައި މަދުވެގެން 46،913 ފަލަސްތީނު ރައްޔިތުން ވަނީ ޝަހީދުވެފަ އެވެ. އަދި 110،750 މީހުންނަށް ވަނީ ޒަޚަމްވެފަ އެވެ.