މިދިޔަ އާދީއްތަ ދުވަހު އޮތް ރިއަލިޓީ ޝޯ ބިގްބޮސް ސީޒަން 18ގެ ފިނާލޭއަށް ބޮލީވުޑްގެ މަޝްހޫރު ބައެއް ތަރިންނަށް ދައުވަތު ދިނެވެ. އޭގެ ތެރޭގައި ބޮލީވުޑްގެ "ކިލާޑީ"، އަކްޝޭ ކުމާރު ވެސް ހިމެނެ އެވެ.

ފިނާލޭގައި ބައިވެރިވާން އަކްޝޭ ޝޯގެ ސެޓަށް އައި ނަމަވެސް އޭނާ ވަނީ ޝޫޓިންގައި ބައިވެރިނުވެ ކުއްލި ގޮތަކަށް ސެޓު ދޫކޮށް ގޮސްފަ އެވެ.

އަކްޝޭ ފިނާލޭގެ ސެޓުން ދިޔައީ ސަލްމާން ސެޓަށް ނައިސްގެން ޝޫޓިން ނުފެށި ލަސްވާތީ އެކަމާ ރުޅި އައިސްގެން ކަމަށް މީޑިއާގައި އަޑު ފެތުރުނެވެ.

އެހެން ނަމަވެސް އޭގެ ފަހުން އޮތް ނޫސްވެރިންގެ ބައްދަލުވުމެއްގައި އަކްޝޭ ވަނީ އެކަމާ ބެހޭގޮތުން ވާހަކަ ދައްކައި ކަން ވީގޮތް ސާފުކޮށްދީފަ އެވެ.

އަކްޝޭ ބުނީ ފިނާލޭ ދޫކޮށް އޭނާއަށް ދާން ޖެހުނީ ކުރިން ރޭވިފައި އޮތް ކަމަކަށް ދާން ޖެހޭތީ ކަމަށާއި އޭގެ ކުރިން ސަލްމާންއަށް ގުޅައި ވާހަކަ ދެއްކި ކަމަށެވެ.

"އަހަރެން ގުޅިން ސަލްމާންއަށް. އޭނާ ބުނީ މިއުޅެނީ އަމިއްލަ ކަމެއްގައި ތާށިވެގެންނޭ. 40 ވަރަކަށް މިނެޓު ވާނެއޭ،" އަކްޝޭ ބުންޏެވެ.

އަކްޝޭގެ އިތުރުން ވެސް ފިނާލޭގައި ބޮލީވުޑްގެ މަޝްހޫރު ތަރި އާމިރު ޚާން ވެސް ފެނިގެންދިޔަ އެވެ. އާމިރުއާއި ސަލްމާން ވަނީ 90ގެ އަހަރުތަކުގައި ނުކުތް "އަންދާޒް އަޕްނާ އަޕްނާ"ގައި އެކުގައި މަސައްކަތް ކޮށްފަ އެވެ.

ބިގްބޮސް ފިނާލޭގައި އެ ޝޯގެ އެއްވަނައަށް ކަރަންވީރު މެހެރާ ހޮވުނުއިރު ރަނަރަޕްއަކީ ވިވިއަން ޑިސެނާ އެވެ. ދެވަނަ ރަނަރަޕްއަކީ ރަޖަތު ދަލާލް އެވެ.