ފައިސަލް ރާއްޖެއިން ބޭރަށް ރަސްމީ ދަތުރުތައް ނުކުރަން އަންގައިފި
ރޭޕްކޮށް މަރާލި ޑޮކްޓަރުގެ ގާތިލަށް ލިބުނީ ޖަލު ހުކުމެއް
ޑީއެންއާރްގެ ވެރިންގެ މައްސަލަ ބަލަން ފައްޔާޒު ގޮވާލައްވައިފި
ކުރި ފަށާފައި ހުރި މަސައްކަތްތައް ހުއްޓިފައި ވަނިކޮށް، ރ. ވާދޫއަށް އިތުރު ވައުދު ފުންޏެއް ރައީސް މުހައްމަދު މުއިއްޒު މިއަދު އޮއްސާލައްވައިފި އެވެ.
ވަޒީރުންނާއި ސަރުކާރުގެ ބައެއް މުއައްސަސާތަކުގެ އިސްވެރިން ހިމެނޭހެން ބޮޑު ވަފުދަކާއެކު ވާދޫއަށް މިއަދު ހެނދުނު ވަޑައިގެން ރައީސް މުއިއްޒު ވިދާޅުވީ ވާދޫގެ ހުއްޓިފައިވާ މަސައްކަތް ވެސް ވަރަށް އަވަހަށް ފެށޭނެ ކަމަށާއި، ވާދޫ ރައްޔިތުން އެދޭ ގޮތަށް ބަނދަރު ތަރައްގީ ކޮށްދެއްވާނެ ކަމަށެވެ.
ރައީސް މުއިއްޒުގެ ވާހަކަފުޅު ފެއްޓެވީ ރިޔާސީ އިންތިޚާބުގައި ވެވަޑައިގެންނެވި ވައުދުތައް ފުރިހަމަކޮށްދެއްވާނެކަމުގެ ޔަގީންކަން ދެއްވަމުންނެވެ. އެމަނިކުފާނު ވައުދުވީ ފުއްދުމަށް ކަމަށާއި، އެއީ ރަށުގެ ތަރައްގީއަށް ރައްޔިތުންކުރާ އުންމީދު ކަމަށް ރައީސް މުއިއްޒު ވިދާޅުވި އެވެ.
"އަޅުގަނޑު ދޭނެ ޔަގީންކަމަކީ މިސަރުކާރަކީ ތިބޭފުޅުންގެ ތި ތަރައްގީގެ ވިސްނުމުގައި އަމިއްލައަށް އިސްނަގައިގެން ކުރާ މަސައްކަތަށް ފުރިހަމައަށް އެއްބާރުލުންދޭނެ ސަރުކާރެއްކަން. އިރާދަކުރެއްވިއްޔާ ސްކޫލަށް ބޭނުންވާ އިތުރު ކޮމްޕިއުޓަރު ލެބާއި ސްޓާފްރޫމް ހެދުމަށް މަގުފަހިކޮށްދިނުމަށް ސަރުކާރުގެ ވުޒާރާތައް މެދުވެރިކޮށް ކޮށްދޭނަން،" އިންތިހާބުގެ ކެމްޕޭންގައިވި ވައުދުގެ މަތިން ހަނދާންކުރައްވަމުން ރައީސް ވިދާޅުވި އެވެ.
އޭގެ އިތުރުން ރައީސް މުއިއްޒު ވިދާޅުވީ ކައުންސިލް އަދި ރައްޔިތުން ބޭނުންވާގޮތަށް ފުރިހަމަ އެއްބާރުލުން ދެއްވާނެ ކަމަށެވެ. އަދި ސްކޫލަށް ޖާގަ އިތުރުކުރުން ކަމަށް ވިޔަސް ވަސީލަތް އިތުރުކުރުން ވެސް ކުރިއަށްދާނެ ކަމަށް އެމަނިކުފާނު ވިދާޅުވި އެވެ.
"ހަމަ އެހެންމެ ސިއްހީ ދާއިރާއަށް ވެސް. ހުރިހާ ރަށަކަށް ލެބޯރެޓަރީ އިތުރުކޮށް ޚިދުމަތްދޭ ވަގުތު އިތުރުކޮށްދިނުން އެއީ އަޅުގަނޑު ވެފައިވާ ވައުދެއް. އެކަން ކުރިއަށްދާނެ،" ރައީސް ވިދާޅުވި އެވެ.
ރައީސް ވިދާޅުވީ ވާދޫގައި ވެސް ހުރިހާ ދާއިރާއަކުން ކުރަން ހުރި މަސައްކަތްތައް އަމަލީގޮތުން ހިނގައި މިއަހަރު ބައެއް މަޝްރޫއުތައް ނިމޭނެ ކަމަށެވެ. އެގޮތުން ވާދޫއަށް ބިން އިތުރުކުރުމަށް ރައްޔިތުން ބޭނުންވާކަން ފާހަގަކުރައްވާ ރައީސް ވިދާޅުވީ މި އަހަރު ނުވަތަ އަންނަ އަހަރު ބިން ހިއްކުމުގެ މަސައްކަތް ކުރިއަށް ގެންދަވާނެ ކަމަށެވެ. އަދި ފުލުހުންގެ ޚިދުމަތް ފުޅާކުރުމަށް ވެސް މަޝްރޫއެއް ފަށާފައިވާ ކަމަށާއި، ހުރިހާ ރަށަކަށް ބޭނުންވާ މިންވަރަށް އަދި ސައިޒަށް ފުލުހުންގެ މަރުކަޒު ގާއިމްކުރައްވާނެ ކަމަށް ރައީސް ވިދާޅުވި އެވެ.
ރައީސް ވަނީ މިއަހަރުގެ ނިޔަލަށް ރާއްޖޭގެ ހުރިހާ ރަށެއްގައި އެރަށަކަށް އެކަށީގެންވާ މިންވަރަށް ފުލުހުންގެ އަމިއްލަ އިމާރާތުގައި ޚިދުމަތް ފަށާނެ ކަމަށާއި، އޭގެ ތެރޭގައި ވާދޫ ވެސް ހިމެނޭކަން ފާހަގަކުރައްވައިފަ އެވެ.
ރައީސް ވިދާޅުވީ އެމަނިކުފާނު ރަށްރަށަށް ދަތުރުކުރައްވަނީ ރައްޔިތުން ބޭނުންވާ ކަންކަންކޮށްދިނުމުގެ ޔަޤީންކަން ދެއްވުމަށް ކަމަށެވެ. އަދި ވަޒީރުން ވެސް އެމަނިކުފާނުގެ އަރިހުގައި ދަތުރުކުރައްވަނީ ރައްޔިތުން ބޭނުންވާ ގޮތަށް މަޝްރޫއުތައް ހިންގައި، ނަތީޖާ ނެރެދިނުމަށް ކަމަށް ރައީސް ވިދާޅުވި އެވެ.
