ސަރުކާރުގެ އެކި ކުންފުނިތަކުން ނޫސްތަކަށް ބޮޑެތި އަދަދުތަކުން ފައިސާ ބަހަމުންދާކަން "ހުރިހާ"އަށް އެނގިއްޖެ އެވެ.

ސަރުކާރުގެ ކުންފުނިތަކުން ނޫސްތަކަށް ފައިސާ ދެނީ އެ ކުންފުންފުންޏެއްގެ ކަންކަން ޕްރޮމޯޓްކުރުމަށެވެ. އެއީ އާންމު އުސޫލުން ޒަމާނުއްސުރެ ކުރާ ކަމެކެވެ. ނަމަވެސް މައްސަލައަކީ ވަކި މި މަގްސަދާ ހިލާފަށް މި ސަރުކާރުން އަލަށް ރަޖިސްޓްރީކޮށްފައިވާ އަދި އެހާ ބޮޑަށް ނުހިންގާ ނޫސްތަކަށް ފައިސާ ދޭތީ އެވެ.

"ހުރިހާ"އާ ވާހަކަދަމުން ސްޓެލްކޯ އާއި އެސްޓީއޯ އަދި އެމްޕީއެލްގެ އޮފިޝަލަކު ވިދާޅުވީ އެ ކުންފުނިތަކުން ފައިސާ ދޭންޖެހެނީ ރައީސް އޮފީހުގެ ކޮމިޔުނިކޭޝަން މިނިސްޓަރު އިބްރާހީމް ހަލީލް ފޮނުވާ ލިސްޓެއްގައިވާ މީޑިއާތަކަށް އެކަނި ކަމަށެވެ.

"ހަލީލް ފޮނުވާ ލިސްޓްގައިވާ މީޑިއާތައް ފިޔަވައި އެހެން މީޑިއާތަކަށް ސްޕޮންސާދިނުން ރައީސް އޮފީހުން ވަނީ މަނާކޮށްފައި،" ސަރުކާރު ކުންފުންޏެއްގެ އޮފިޝަލަކު ވިދާޅުވި އެވެ.

މި ސަރުކާރު އައިފަހުން ރައީސް މުއިއްޒު ޕްރޮމޯޓްކުރުމަށްޓަކައި ގިނަ ނޫސްތަކެއް ވަނީ ރަޖިސްޓްރީކޮށްފަ އެވެ. އެފަދަ ނޫސްތަކުން ހަމައެކަނި ކުރާ ކަމަކީ ރައީސް މުއިއްޒު ޕްރޮމޯޓް ކުރުމެވެ. ރައީސް މުއިއްޒު ޕްރޮމޯޓްކުރާ ހަބަރުތައް ފިޔަވައި އެހެން އެއްވެސް ހަބަރެއް އެފަދަ ނޫސްތަކުން ނުގެނެސްދެ އެވެ.

އެންމެ އާދައިގެ ނޫހަށް ވެސް 10،000 ރުފިޔާ ސްޕޮންސާގެ ގޮތުގައިދެ އެވެ. ފައިސާ ދޭ ކުންފުނިތަކުގެ ތެރޭގައި ސްޓެލްކޯ، އެމްޓީސީސީ، އެމްޕީއެލް، އެސްޓީއޯ ފަދަ ކުންފުނިތައް ހިމެނެއެވެ.

ހުޅުމާލެ ތަރައްގީކޮށް ހިންގާ އެޗްޑީސީ ޕްރޮމޯޓްކުރަން މި ސަރުކާރު ހަވާލުވި ފަހުން 21 މީޑިއާއަކަށް ފައިސާ ބަހަމުންދާ އެ ކުންފުނިން ވަނީ ބުނެފަ އެވެ.

މައުލޫމާތު ހޯދައި ލިބިގަތުމުގެ ގާނޫނުގެ ދަށުން "ހުރިހާ" އިން ހުށަހެޅި އާރްޓީއައި އަކަށް ދިން ޖަވާބުގައި ފައިސާ ދެނީ 21 މީޑިއާއަކަށް ކަމަށް ބުނެފައިވެ އެވެ. ނަމަވެސް އެ މީޑިއާތަކުގެ ނަންތައް ހާމަކުރެވެން ނެތް ކަމަށް އެ ކުންފުނިން ވަނީ ބުނެފަ އެވެ. އެ މައުލޫމާތު ވެސް ދިނީ މައުލޫމާތު ނުދޭން ބަހަނާ ދައްކަމުން ދަނިކޮށް އިންފޮމޭޝަން ކޮމިޝަނަރުގެ އެންގެވުމަކަށެވެ.

މީޑިއާތަކުގެ ނަންތަކަކީ ނުދީ ހިފެހެއްޓޭނެ މައުލޫމާތެއް ކަމަށްނުވާތީ، އެ މައުލޫމާތު ފަސް ދުވަހުގެ ތެރޭގައި ދިނުމަށް އިންފޮމޭޝަން ކޮމިޝަނަރު ވަނީ އެ ކުންފުންޏަށް އަންގާފަ އެވެ.