ދަ ޑިމޮކްރެޓްސްގެ ދަފުތަރުގައި ތިބި 700 އެއްހާ މެންބަރުން ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) އަށް ވަގަށް ވައްދާފައިވާ ކަމަށް ބުނެ ޑިމޮކްރެޓުން ފުލުހުންގެ އިދާރާއަށް މައްސަލަ ހުށަހަޅައިފި އެވެ.

ޑިމޮކްރެޓްސްގެ އިތުރުން ވެސް އެތައް ބަޔަކު ޕީއެންސީއަށް ވަގަށް ވައްދާފައިވާ މައްސަލަ ތަހުގީގު ކޮށްދިނުމަށް އެދި ފުލުހުންނަށް ޑިމޮކްރެޓްސްގެ ފަރާތުން މައްސަލަ ހުށަހެޅުމަށްފަހު ނޫސްވެރިންނަށް މައުލޫމާތު ދެއްވަމުން އެ ޕާޓީގެ ވަގުތީ ރައީސް، ހުސެއިން ފިރުޝާން ވިދާޅުވީ ޑިމޮކްރެޓްސްއިން އެކަނި ވެސް 700 އެއްހާ މެންބަރުން ޕީއެންސީއަށް ވައްދާފައިވާކަން މިހާތަނަށް އެނގިފައިވާ ކަމަށެވެ.

ފިރުޝާން ވިދާޅުވީ ޑިމޮކްރެޓްސް ޕާޓީގައި ތިބި ބަޔަކު ޕީއެންސީއަށް ވަގަށް ވައްދާފައިވާތީ ގިނަ ބައެއްގެ ޝަކުވާތައް ލިބެމުން އަންނަ ކަމަށެވެ. އަދި މިއަދު ފުލުހަށް ޑިމޮކްރެޓްސްއިން މައްސަލަ ހުށަހެޅީ އެ ޕާޓީގެ މެންބަރުންގެ އިތުރުން ވެސް ޕީއެންސީއަށް ވަގަށް ވައްދާފައިވާ މީހުންގެ މައްސަލަ ސީރިއަސް މައްސަލައެއްގައި ގޮތުގައި ބަލައި ޖިނާއީ ތަހުގީގެއް ހިންގައި ދިނުމަށް އެދިފައިވާ ކަމަށް އޭނާ ވިދާޅުވި އެވެ.

"ޑޭޓާބޭސްއަށް ބަލާލީމާ އަޅުގަނޑުމެންނަށް މި ފަހަގަވީ އޯގަސްޓު މަހުން ފެށިގެން ހަމަ ގަނޑުކޮށް މީހުން މަދުވެފައި ހުރިކަން ޕާޓީން، ދެން މެންބަރުންނަށް ގުޅައިގެން މިކަމުގެ ހަބަރު ބަލައިލިއިރު، މެންބަރުންނަށް އެނގިގެނެއް ނޫން މިކަން ހިނގާފައި އޮތީ. އެހެންވީމާ މިއީ ވަރަށް ބޮޑު މައްސަލައެއް، ވަރަށް ބޮޑު ކުށެއް، މިއީ މުޅި މަލްޓި ޕާޓީ ޑިމޮކްރެޓިކް ސިޔާސީ ޕާޓީތަކަށް، ޕާޓީ ނިޒާމަށް ދެވޭ ވަރަށް ބޮޑު ގެއްލުމެއް ހަގީގަތުގައި،" ފިރުޝާން ވިދާޅުވި އެވެ.

އޭނާ ވިދާޅުވީ ޑިމޮކްރެޓްސްގެ މެންބަރުންތަކެއް ވަގަށް ޕީއެންސީއަށް ވެއްދި މައްސަލަ މިއަދު އިލެކްޝަންސް ކޮމިޝަނަށް ވެސް ހުށަހަޅާނެ ކަމަށެވެ.

ވަގު ފޯމު ފުރައިގެން ޕީއެންސީއަށް މީހުން ވެއްދި މައްސަލަ ޑިމޮކްރެޓްސްގެ އިތުރުން އިދިކޮޅު މައި ޕާޓީ، އެމްޑީޕީން ވެސް ވަނީ ފުލުހުންނަށް ހުށަހަޅައިފަ އެވެ. އެމްޑީޕީން ފުލުހަށް ހުށަހެޅީ އެ ޕާޓީގެ 96 މެންބަރެއް ޕީއެންސީއަށް ވަގަށް ވައްދާފައިވާ މައްސަލަ އެވެ.

އެފަދަ އެތައް މައްސަލައެއް ތިލަވެފައިވާއިރު، ފުލުހުންނާއި ސިފައިންގެ ތެރެއިން ވެސް ބަޔަކު ޕީއެންސީއަށް ވަގަށް ވައްދާފައިވާ މައްސަލަތަކެއް މިހާރު ވަނީ ފެންމަތިވެފަ އެވެ. އެގޮތުން 10 ފުލުހަކާއި ސިފައިންގެ ހަތް މީހަކަށް އެނގުމެއް ނެތި އެ މީހުން ޕީއެންސީއަށް ވައްދާފައިވާކަން ވަނީ ފަޅާއަރާފަ އެވެ.

އޭގެ އިތުރުން ރައީސް މުއިއްޒުގެ އާއިލާގެ ބޭފުޅުންތަކަކާއި ކުރީގެ ރައީސް ޔާމީން އިސްވެ ހުންނަވައި އުފެއްދެވި ޕީޕަލްސް ނެޝަނަލް ފްރަންޓު (ޕީއެންއެފް) ގެ އިސް ބައެއް ބޭފުޅުން ހިމެނޭހެން އެ ޕާޓީގެ ވެސް އެތައް ބަޔަކު ޕީއެންސީއަށް ވައްދާފައިވާ މައްސަލަ ވަނީ ބޮޑުވެފަ އެވެ.

ޕީއެންއެފްގެ މެންބަރުންތަކެއް ޕީއެންސީއަށް ވެއްދުމާއެކު ޕީއެންއެފްގެ އާންމު މެންބަރުންގެ އަދަދު ވަނީ 3000 އަށް ވުރެ ދަށްވެފަ އެވެ.

މި ހުރިހާ މައްސަލައެއް ފެންމަތިވުމުން، އިލެކްޝަންސް ކޮމިޝަނުން މިދިޔަ ބުރާސްފަތި ދުވަހު ވަނީ ޕާޓީތަކުގެ ދަފުތަރު އާންމުކޮށް، ޝަކުވާ ހުށަހެޅުމުގެ ފުރުސަތު އާންމުކޮށް ހުޅުވާލައިފަ އެވެ. ޝަކުވާ ހުށަހަޅަން ޖެހޭނީ މައި އިލެކްޝަން ޕޯޓަލް ނުވަތަ ޝަކުވާ ޕޯޓަލް މެދުވެރިކޮށެވެ.

އިއުލާނުކޮށްފައިވާ ދަފުތަރަށް ޝަކުވާ ހުށަހެޅުމުގެ ސުންގަޑިއަކީ ފެބުރުވަރީ 10 ވާ ހޯމަ ދުވަހުގެ މެންދުރު ފަހު 3:00 އެވެ. އިލެކްޝަންސް ކޮމިޝަނަށް ގޮސްގެން ވެސް ޝަކުވާ ހުށަހެޅޭނެ އެވެ.