މިދިޔަ ނޮވެމްބަރު 23 ވަނަ ދުވަހު "ހިންތާ" މި ނަމުގެ ދިވެހި ސީރީޒްއެއްގެ ޓީޒާއެއް މީޑިއާނެޓުގެ ވީޑިއޯކްލަބް ޚިދުމަތުގެ ފަރާތުން ސޯޝަލްމީޑިއާގައި ބެލުންތެރިންނަށް ދޫކޮށްލި އެވެ. ރާޒުވާ ކުޅިގަނޑަކާއި، ލިޔެކިޔުންތަކަކާއި، ދަންފުޅިއަކާއި ސިއްކައެއް މި ޓީޒާއިން ފެނިގެންދެ އެވެ. މާ ބޮޑަށް މި ސީރީޒްގައި ވަނީ ކިހިނެއްކަން މި ޓީޒާއިން ނޭނގުނަސް މިހާ ހިސާބުން ވެސް ގިނަ ބައެއްގެ މެދުގައި މި ސީރީޒްއާމެދު ޝައުގުވެރިކަން އުފެދިގެންދެ އެވެ.

މި ސީރީޒްގެ ބައެއް މަންޒަރުތައް މިވަނީ މިހާރު ބެލުންތެރިންނާ ހަމައަށް ދޫކޮށްލައިފަ އެވެ. އިއްޔެ ވަނީ މި ސީރީޒްގެ ޓްރެއިލާ ސޯޝަލްމީޑިއާ މެދުވެރިކޮށް ބެލުންތެރިންނަށް ދައްކާލާފަ އެވެ. ރިލީޒްކުރުމާއެކު މި ސީރީޒްގެ ޓްރެއިލާއަށް ގިނަބައެއްގެ ތައުރީފު އަންނަނީ އޮހެމުންނެވެ.

ކޯޕަރޭޓް ތްރިލާއެއް ކަމަށްވާ، މި ސީރީޒްގައި ފެނިގެންދާނީ ޔުމްނާ އާއި ޝިޔާޒްގެ ވާހަކަ އެވެ. ކާމިޔާބު ދެ ވިޔަފާރިވެރިންނެވެ. އުފާވެރި ކައިވެންޏެއްގައި ދިރިއުޅެމުން އަންނަ ދެމަފިރިންނެވެ. ވިޔަފާރީގެ މާހައުލުގައި ދިމާވާ ހާދިސާތަކާއެކު މި ދެމަފިރިންގެ ކައިވެނީގެ ޙަޔާތުގައި ދިމާވާ ތަފާތު އެކިއެކި ކަންކަން މި ސީރީޒްގައި ފެނިގެންދާނެ އެވެ.

މި ސީރީޒްގެ ލީޑު ރޯލުން ފެނިގެންދާނީ ޔުމްނާގެ ރޯލުން އާއިޝަތު ރާއިޝާ އަދި ޝިޔާޒްގެ ރޯލުން ސާމީ ހުސެއިން އެވެ. މިއީ ރާއިޝާ (ރާއި) ވީޑިއޯކްލަބްގެ ސީރީޒްއަކުން ފެނިގެންދާ ފުރަތަމަ ފަހަރުކަން ފާހަގަކޮށްލެވެ އެވެ. ސީރީޒްގެ ޓްރެއިލާއަށް ފަހު ގިނަބައެއްގެ ލޯތައް ވަނީ ރާއިއަށް ހުއްޓިފަ އެވެ. ރާއިގެ އެކްޓިންގެ ނެޗުރަލް ކަމަށާއި އަދި ރީތި ކަމަށް ގިނަ ބަޔަކު އަންނަނީ ތައުރީފު ކުރަމުންނެވެ. މި ސީރީޒްގައި ޝިޔާޒްގެ ރޯލުން ފެނިގެންދާ ސާމި، ލީޑް ރޯލަކުން ފެނިގެންދާ މިއީ ފުރަތަމަ ފަހަރު ވެސް މެ އެވެ. މީގެ ކުރިން ސާމި ކުޅެފައިވާ ރޯލުތަކާއި ޚިލާފަށް މި ސީރީޒްގައި ސާމިގެ އެކްޓިންގެ މޮޅުކަން ޓްރެއިލާ ބަލާލުމުން ވެސް ފެނިގެންދެ އެވެ. މީގެ އިތުރުން ފިލްމީ ދާއިރާގައި މަޝްހޫރު ނަންތައް ކަމަށްވާ ހަސަން މަނިކު، މުހައްމަދު މަނިކު، އިފްނާޒް ފިރާގް، ރަޝްފާ ފާރޫގް އަދި ތާތި އާދަމް ވެސް އެކި ރޯލުތަކުން ފެނިގެންދާނެ އެވެ.

އެމް އޮރިޖިނަލްސް ބޭނާގެ ދަށުން ތައްޔާރުކުރާ މި ސީރީޒްއަކީ "އެއްކާފް"ގެ ޕްރޮޑަކްޝަނެކެވެ. ވީޑިއޯކްލަބްއިން ފެނިގެންދިޔަ ކާމިޔާބު އަދި މަގްބޫލު ސީރީޒް "ގަރީނާ" އަދި ފިލްމު "މަރިޔަމް" އަކީ އެއްކާފްގެ ޕްރޮޑަކްޝަނެކެވެ. ހިންތާ ސީރީޒް ޑައިރެކްޓްކުރަނީ ހުނަރުން ފުރިގެންވާ ދިވެހި ފިލްމީ ދުނިޔޭގައި އެންމެ މަގްބޫލު އެއް ޑައިރެކްޓަރު އަދި އެކްޓަރު ކަމަށްވާ ރަވީ ފާރޫގެވެ. މިއީ އެމް އޮރިޖިނަލްސް ބެނާގެ ދަށުން ތައްޔާރުކުރާ ސީރީޒްއެއްގައި ރަވީގެ ފުރަތަމަ ޑައިރެކްޝަންކަން ފާހަގަކޮށްލެވެ އެވެ. އަދި މި ސީރީޒްގައި އަޒްހަރުގެ ރޯލުން ވެސް ރަވީ ފެނިގެންދާނެ އެވެ. މި ސީރީޒްގެ ވާހަކަ ތައްޔާރުކޮށްފައިވަނީ "މަރިޔަމް"، "ގަރީނާ"، "ބީވީމާ" ފަދަ ފުރިހަމަ ސްކްރީންޕްލޭތައް ލިޔެފައިވާ މޮޅު ލިޔުންތެރިޔާ އަހުމަދު ޒަރީރު އެވެ.

"ހިންތާ" މީޑިއާނެޓުގެ ވީޑިއޯކްލަބް ޚިދުމަތަށް ރިލީޒްކުރުމަށް ހަމަޖެހިފައި ވަނީ މިމަހުގެ 30 ވާ ބުރާސްފަތި ދުވަހު އެވެ. މި ސީރީޒް އެކުލެވިގެންވަނީ ޖުމްލަ 10 އެޕިސޯޑުގެ މައްޗަށެވެ. މީޑިއާނެޓުގެ ކަސްޓަމަރުންނަށް އެމްޓީވީ ސާވިސް މެދުވެރިކޮށް ރާއްޖޭގެ ކޮންމެ ތަނެއްގައި ހުރެ މި ސީރީޒްގެ އެޕިސޯޑުތައް ބަލާލެވޭނެ އެވެ. އަދި އެމްއެސް ގްލޯބަލްއާއި އެމްއެސް ޑީޖިޓަލް ގްލޯބަލް މެދުވެރިކޮށް ރާއްޖެއިން ބޭރުގައި ދިރިއުޅޭ ފަރާތްތަކަށް ވެސް މި ސީރީޒް ބަލާލެވޭނެ އެވެ.

"ރޯލީމޭ" ސީރީޒްއާއެކު 2024 ވަނަ އަހަރު ނިންމާލުމަށްފަހު 2025 ވަނަ އަހަރު ވީޑިއޯކްލަބްއިން ގެނެސްދޭ ފުރަތަމަ ސީރީޒްއަކަށް ވެގެންދާނީ "ހިންތާ" އެވެ. މީގެ އިތުރުން ވެސް މުޅިން އާ ދިވެހި ފިލްމާއި ޑްރާމާ އަދި އެހެން ގައުމުތަކުގެ ފިލްމާއި ސީރީޒް މި އަހަރު ތެރޭގައި މީޑިއާނެޓުގެ ވީޑިއޯކްލަބް ޚިދުމަތުން ބެލުންތެރިންނާ ހަމައަށް ގެނެސްދިނުމަށް ވަނީ ހަމަޖެހިފަ އެވެ.