ރައްޔިތުންގެ މަޖިލީހަށް އިންތިހާބުވި ޕާޓީން ވަކިވާ މެމްބަރުންގެ ގޮނޑި ގެއްލޭ ގޮތަށް ގާނޫނުއަސާސީއަށް ގެނައި އިސްލާހުގެ މައްސަލަ ސުޕްރީމް ކޯޓުގައި ބަލަމުން ދަނިކޮށް، މެންބަރުންގެ ގޮނޑި ނުގެއްލޭނެ ކަމަށް ވަގުތީ އަމުރެއް ނެރެދޭން އެ ކޯޓުގައި މިއަދު އެދިއްޖެ އެވެ.

ވަގުތީ އަމުރެއް ނެރެދިނުމަށް ހުށަހެޅުއްވީ، ގާނޫނު އަސާސީ ބަދަލުކުރި މައްސަލަ ސުޕްރީމް ކޯޓަށް ހުށަހެޅުއްވި ކެންދޫ ދާއިރާގެ ކުރީގެ މެންބަރު އަލީ ހުސެއިން އެވެ.

އަލީ ހުސެއިން އެދިވަޑައިގެންފައި ވަނީ މައްސަލަ ބަލައި ނިމެންދެން މެންބަރަކު މަގާމުން ވަކިކުރުމުގެ އެއްވެސް އިޖުރާއަތެއް ނުހިންގުމަށް ދައުލަތުގެ ހުރިހާ އިދާރާތަކެއްގެ މައްޗަށް އަމުރުކޮށްދެއްވުމަށެވެ.

މި މަހުގެ 18 ވަނަ ދުވަހު މި މައްސަލައިގައި ބޭއްވި ފުރަތަމަ އަޑުއެހުމުގައި ވަނީ ސްޕްރީމް ކޯޓަށް އެ މައްސަލަ ބެލޭނެކަމަށް ނިންމާފަ އެވެ.

ސުޕްރީމް ކޯޓުގައި ދައުލަތުން ބުނެފައިވަނީ ގާނޫނުއަސާސީއަށް ގެނެވޭ އިސްލާހެއްގެ މައްސަލަ ސުޕްރީމް ކޯޓަށް ނުބެލޭނެ ކަމަށެވެ. އަދި ގާނޫނުއަސާސީގެ ދަށުން ސުޕްރީމް ކޯޓަށް ބެލޭނީ ގާނޫނެއް ނުވަތަ ގަވާއިދުތަކުގެ މައްސަލަތައް ކަމަށްވާތީ އެ މައްސަލަ ސުޕްރީމް ކޯޓަށް ނުބެލޭނެ ކަމަށް ބުނެ އިޖްރާއީ އިއުތިރާޒެއް ސުޕްރީމް ކޯޓުގައި ދައުލަތުން ނެގި އެވެ.

އެކަމާ ގުޅިގެން ފަނޑިޔާރުންގެ ބެންޗުން ނިންމެވީ އެ މައްސަލަ މިވަގުތު ކުރިއަށް ގެންދެވޭނެ ކަމަށެވެ. އަދި މައްސަލަ ނިންމުމުގައި، ދައުލަތުގެ އިއުތިރާޒާ މެދު ގޮތެއް ނިންމަވާނެ ކަމަށް ބެންޗުން ވިދާޅުވި އެވެ.

މައްސަލަ ބެލޭނެ ކަމަށް ނިންމުމަށް ފަހު، ދައުލަތުގެ އެދިގެން ދައުވާއަށް ޖަވާބުދާރީވާން 10 ދުވަހުގެ މުއްދަތެއް ކޯޓުން ވަނީ ދީފަ އެވެ.