ރަމަޟާން މަހާ ގުޅުވައިގެން އިނގިރޭސި ވިލާތުގެ މުސްލިމުންނަށް ބަހާ ފުޑް ޕެކޭޖްތައް ބަންދު ކުރުމުގައި އެގައުމުގެ ރަސްގެފާނު ޗާލްސް ތިންވަނަ އާއި ރާނީ ކަމިލާ ބައިވެރިވެއްޖެ އެވެ.

މީގެ ދެ ދުވަހެއް ކުރިން ސޯޝަލް މީޑިއާގައި ވީޑިއޯއެއްގައި ފެންނަނީ ޗާލްސްގެ ދެ ކަނބަލުން ކަރުދާސް ކޮތަޅުތަކަކަށް ކަދުރު އަޅާ މަންޒަރެވެ.

ހަބަރުތައް ބުނާ ގޮތުގައި ޝާހީ ދެކަނބަލުން މުސްލިމުންގެ އެ މުނާސަބަތުގައި ބައިވެރިވެފައި ވަނީ ލަންޑަނުގައި ހުންނަ އިންޑިއާގެ ރެސްޓޯރެންޓަކަށް ކުރި ޒިއާރަތެއްގަ އެވެ.

https://www.tiktok.com/@skynews/video/7475809368873635094

މުސްލިމުން ގިނަ ސަރަހައްދެއްގައި ހުންނަ އެ ރެސްޓޯރެންޓަށް ޗާލްސްއާއި ކަމިލާ ގޮސްފައިވަނީ ރެސްޓޯރެންޓުގައި ރަމަޟާން މަހަށް ތައްޔާރު ވުމުގެ ކަންކަން ކުރިއަށް ދިޔަ ވަގުތެއްގަ އެވެ.

ޝާހީ ދެކަނބަލުންގެ މި އަމަލުފުޅަށް ގިނަ ބައެއްގެ ތައުރީފު ލިބެމުން އަންނައިރު މިއީ އިނގިރޭސި ވިލާތުގައި މުސްލިމުންނަށް ދެވިފައިވާ ގަދަރު ދައްކުވައިދޭ ކަމެއް ކަމަށް އެމީހުން ބުނެ އެވެ.

ދުނިޔޭގެ ގިނަ ގައުމުތަކަކަށް މިއަދު ރަމަޟާން މަސް ފެށިފައިވާއިރު އެކި ކަންކޮޅުތަކުގައި ތިބި މުސްލިމުން މިއަދު ތިބީ ރޯދަ އަށެވެ.