ދިރާސީ އަހަރު ފެށުމުގެ ކުރިން ފޮތްތައް ދޫކުރެވޭނެކަމަށް އެޑިޔުކޭޝަން މިނިސްޓަރު ޑރ. އިސްމާއީލް ޝަފީއު ވިދާޅުވެއްޖެ އެވެ.

އަލަށް ފެށޭ ދިރާސީ އަހަރަށް ވަރަށް ފުރިހަމައަށް ތައްޔާރުވަމުންދާ ކަން ފާހަގަކުރައްވައި އެމަނިކުފާނު ވިދާޅުވީ، ކިޔެވުން ފެށުމުގެ ކުރިން ދަރިވަރުންނަށް ފޮތްތައް ހަވާލުކޮށް ނިމޭނެ ކަމަށެވެ.

މިކަމާ ގުޅިގެން "ރާއްޖެ އެމްވީ" އަށް މައުލޫމާތު ދެއްވަމުން މިނިސްޓަރު ޝަފީއު ވިދާޅުވީ، އެޑިޔުކޭޝަން މިނިސްޓްރީ އާއި ސްކޫލުތަކުން އައު ދިރާސީ އަހަރަށް ތައްޔާރުވުމުގެ މަސައްކަތްތައް ވަރަށް ފުރިހަމައަށް ކުރިއަށްދާ ކަމަށާއި، ރޭވިފައިވާ ގޮތުގެ މަތިން ފޮތްތައް ދޫކުރެވެމުންދާ ކަމަށެވެ.

މިނިސްޓަރު ވިދާޅުވި ގޮތުގައި މިހާރު ސްކޫލުތަކުން ދޫކުރަމުންދަނީ އެންމެ ފަހު ބެޗްގެ ގޮތުގައި ގްރޭޑް 4 އަދި 5 ގެ ދަރިވަރުންގެ ފޮތްތަކެވެ. އަދި ފޮތްތައް ދޫކުރުމަށް ކަނޑައެޅި ތާރީޚަށްވުރެ ދެ ދުވަސް ކުރިން އެ މަސައްކަތް ނިންމާލެވޭނެ ކަމަށް މިނިސްޓަރު ވިދާޅުވި އެވެ.

މިނިސްޓަރު މިފަދައިން ވިދާޅުވެފައިވަނީ، ބައެއް ފަރާތްތަކުން ސޯޝަލް މީޑިއާގައި، ސްކޫލު ފޮތްތައް ދޫކުރުމުގައި ލަސްތަކެއް ދިމާވެފައިވާ ކަމަށާއި، ބައެއް ޓެކްސްޓް ފޮތްތައް އަދިވެސް ނުލިބޭ ކަމުގެ ކަންބޮޑުވުން ފާޅުކޮށްފައި ވަނިކޮށެވެ.

ރަމަޟާން މަހާ ދިމާކޮށް، ރާއްޖޭގެ ހުރިހާ ސްކޫލެއްގެ ދަރިވަރުންނަށް ޗުއްޓީ ދީފައިވާއިރު، 2025 ވަނަ އަހަރުގެ ފެބްރުއަރީ 27 ވަނަ ދުވަހުން ފެށިގެން އީދު ބަންދާއި ހަމައަށް ސަރުކާރުން ވަނީ ދަރިވަރުނނަށް ޗުއްޓީ ދީފަ އެވެ. ޗުއްޓީ ނިމި، ސްކޫލުތަކުގެ ކިޔެވުން އަލުން ފެށުމަށް ހަމަޖެހިފައިވަނީ އޭޕްރީލް މަހުގެ 7 ވަނަ ދުވަހު އެވެ. އަދި އައު ދިރާސީ އަހަރު ފެށުމަށް ހަމަޖެހިފައިވަނީ 2026 ވަނަ އަހަރުގެ ޖަނަވަރީ 27 ވަނަ ދުވަހު އެވެ.