މިދިޔަ މާޗު މަހު ރާއްޖެއަށް 200،000 އަށްވުރެ ގިނަ ފަތުރުވެރިން ޒިޔާރަތްކޮށްފައިވާ ކަމަށް ޓޫރިޒަމް މިނިސްޓްރީން ބުނެފި އެވެ.

އެމިނިސްޓްރީގެ ތަފާސްހިސާބުތަކުން ދައްކާ ގޮތުން މިދިޔަ މާރިޗު މަހު ރާއްޖެއަށް 203،466 ފަތުރުވެރިން ވަނީ ޒިޔާރަތްކޮށްފަ އެވެ. މިދިޔަ އަހަރުގެ މާރިޗު މަހުގައި 194،227 ފަތުރުވެރިން ރާއްޖެ އައިސްފައިވާއިރު، މިއީ 4.8 ޕަސެންޓް އިތުރުވުމެވެ.

އެމިނިސްޓްރީން ބުނިގޮތުގައި މިހާތަނަށް ރާއްޖެއަށް އެންމެ ގިނަ އަދަދެއްގެ ފަތުރުވެރިން އައިސްފައި ވަނީ ޗައިނާއިންނެވެ.

އެގޮތުން، ޗައިނާއިން 73،997 ފަތުރުވެރިން މިހާތަނަށް ރާއްޖެއަށް ވަނީ ޒިޔާރަތްކޮށްފަ އެވެ. ދެވަނައަށް ރާއްޖެއަށް އެންމެ ގިނަ ފަތުރުވއެރިން އައިސްފައިވާނީ ރަޝިޔާއިންނެވެ. އެގައުމުން 66،933 ފަތުރުވެރިން މިހާތަނަށް ރާއްޖެއަށް ވަނީ އައިސްފަ އެވެ. އޭގެ އިތުރުން ރާއްޖެއަށް އެންމެ ގިނައިން އައިސްފައިވާ ފަތުރުވެރިންގެ ލިސްޓުގެ ތިން ވަނައިގައި ހިމެނެނީ އިނގިރޭސިވިލާތުން އައިސްފައިވާ ފަތުރުވެރިންނެވެ. އިނގިރޭސިވިލާތުން 65،404 ފަތުރުވެރިން މިހާތަނަށް ރާއްޖެ އައިސްފައިވެ އެވެ.

ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން ރާއްޖޭގައި ފަތުރުވެރިންނަށް ޚިދުމަތް ދޭ 1185 ތަނެއް މިވަގުތު ހުޅުވާފައިވެ އެވެ.