ސޮނީ އެންޓަޓައިންމަންޓުން ގެނެސްދޭ އިންޑިއަން އައިޑޮލްގެ 12 ވަނަ ސީޒަނުގެ ޝޯ ތަކަށް އެ ޝޯގެ ޕްރޮޑިއުސަރުން ދަނީ އިންޑިއާގެ ބޮޑެތި ލެޖެންޑުންނަށް ދައުވަތު ދެމުންނެވެ.

އެ ގޮތުން މި ހަފްތާގެ ޕްރޮގްރާމް ހާއްސަކޮށްފައިވަނީ ބޮލީވުޑްގެ ރީތި ހުސްކުރި އެކްޓްރެސް ރޭކާ އަށެވެ. ޝޯގެ ހުރިހާ ބައިވެރިންގެ ހުށައެޅުންތައް ވެސް މި ހަފްތާގައި ހާއްސަކޮށްފައި ވަނީ ރޭކާ އަށެވެ.

މި ޝޯގެ އެންމެ މަގުބޫލު އެއް ބައިވެރިޔާ ކަމަށްވާ އުޓްރަކަންޑްގެ ޕަވަންދީޕް ރާންޖަން ހުށައަޅައިދިނީ 'ދޭކާ އެކް ކްވާބް" އަދި " ހަމޭ އޯރް ޖީނޭ ކީ" އެވެ. މި ހުށައެޅުމުގެ ފުރިހަމަކަމުން ޖަޖުންނާއި ރޭކާގެ ވެސް ބަސްހުއްޓުނެވެ. ތިން ޖަޖުންނާ އެކު ރޭކާ ވަނީ ޕަވަންދީޕަށް ސްޓޭންޑިން އޯވޭޝަނެއް ދީފަ އެވެ.

ޕަވަންދީޕްގެ ލަވައަށް ތައުރީފުކުރަމުން ރޭކާ ބުނީ އޭނާ ބޭނުންވަނީ ޕަވަންދީޕް އެޑޮޕްޓް ކުރަން ކަމަށެވެ. އަދި ޕަވަންދީޕް ގާތު އޭނާ އަށް ޑޮލަކް ( ބެރުގެ ވައްތަރެއް) ޖެހުމަށް ވެސް އެދިފަ އެވެ. ޕަވަންދީޕް ވަނީ އެއްބަސްވެ، އަދި އޭނާ އާއެކު ޑޮލަކް ޖެހުމަށް ރޭކާ ވެސް ބައިވެރިވުމަށް އެދިފަ އެވެ.

ރޭކާ ވަނީ މި ހަފްތާގެ އިންޑިއަން އައިޑޮލްގައި ވަރަށް ފޯރި ނަގާފަ އެވެ. އެގޮތުން ސްނީކާ ބޫޓަކަށް އަރައިގެން ނެށުމާއި ހުރިހާ ބައިވެރިންނަށް ޕަނީރް ކާންދިނުމުގެ އިތުރުން ޝޯގެ ޖަޖް، ނޭހާ ކައްކަރަށް ކައިވެނީގެ ހަދިޔާއެއްގެ ގޮތުން ސާރިއެއް ވެސް ދިނެވެ.

ކައިވެނީގެ ހަދިިޔާއެއްގެ ގޮތުން ރޭކާ ވަނީ ނޭހާ އަށް ސާރީއެއް ހަދިޔާ ކޮށްފައި