ހިންދީ ސީރީޒްތަކުން ގިނަ ބައެއްގެ މަގުބޫލުކަން ހޯދާފައިވާ އެކްޓަރު ދީޕިކާ ކައްކަރުއަށް ފުރަމޭގެ ކެންސަރު ޖެހިފައިވާކަން ހާމަކޮށްފި އެވެ.

ދީޕިކާގެ އިންސްޓަގްރާމް ސްޓޯރީގައި ހިއްސާ ކޮށްފައިވާ ޕޯސްޓެއްގައި ބުނެފައިވަނީ އޭނާގެ ފުރަމޭއިން ޓިއުމަރެއް ފެނި އެ ޓިއުމަރުގެ ސަބަބުން ފުރަމެއަށް ކެންސަރު ފެތުރިފައިވާ ކަމަށެވެ. އެގޮތުން ކެންސަރު މިވަގުތު ހުރީ ސްޓޭޖް 2 ގައި ކަމަށާއި ފަރުވާގެ ކަންކަން މިހާރު ވެސް ފަށައިގެން ކުރިއަށްދާ ކަމަށް ދީޕިކާ ބުންޏެވެ.

"އަހަރެން މިހުރީ ހުރިހާ ކަމެއް ވެސް ވާނީ ރަނގަޅަށް ކަމަށް ވިސްނައިގެން. އިރާދަ ކުރެއްވިޔާ ރަނގަޅުވާނެ. އިންޝާ ﷲ" އޭނާ ބުންޏެވެ.

ދީޕިކާއަށް ކެންސަރު ޖެހިފައިވާކަން އިއުލާން ކޮށްފައި މިވަނީ މިފަހުން އޭނާގެ ސިއްހީ ހާލަތު ދަށްވެ، ހޮސްޕިޓަލުގައި އެޑްމިޓް ކޮށްގެން ފަރުވާ ދީފައި ވަނިކޮށެވެ.

"ސަސުރާލް ސިމަރްކާ" ފަދަ ސީރިއަލްތަކުން އާއްމުންގެ މަގުބޫލުކަން ހޯދި ދީޕިކާ ވަނީ އޭނާއާއެކު އެ ސީރީޒްގައި މަސައްކަތްކުރި ޝުއައިބް އިބްރާހިމްއާ ކައިވެނި ކުރުމަށްފަހު އިސްލާމްވެ އޭނާގެ ނަން "ފާއިޒާ"އަށް ބަދަލުކޮށްފަ އެވެ.