ލާމު ލިންކް ރޯޑުގައި ރޭ ހިނގި ނުރައްކާތެރި އެކްސިޑެންޓު ހިނގާފައިވަނީ ހައިވޭގައި ހުރަހަށް މަޑުކުރި ސައިކަލެއްގައި ކާރު ޖެހިގެންކަން އެނގިއްޖެ އެވެ.

ފުލުހުން ބުނީ ރޭ 19:03 އެހާއިރު ލާމު ލިންކް ރޯޑުގައި އެކްސިޑެންޓެއް ހިނގައިގެން ރިޕޯޓްކޮށްފައިވާ ކަމަށެވެ. އެ އެކްސިޑެންޓުގައި ސައިކަލް ދުއްވި މީހާގެ ފައިބިނދި ފަހަތުގެ އިން މީހާގެ ފައިގައި ރެނދުލާފައިވާ ކަމަށް ފުލުހުން ބުނެފައިވެ އެވެ. އަނިޔާ ވެފައިވަނީ ދެ ފިރިހެނުންނަށެވެ. އޭގެ ތެރެއިން ފައި ބިނދުނު މީހާގެ ފައިގެ ސާޖަރީ ހެދުމަށް މިއަދު ވަނީ މާލެ ގެނެސްފަ އެވެ.

ކާރު ދުއްވަން އިން މީހާއަށް އަނިޔާއެއް ލިބިފައި ނުވާއިރު، ކާރާއި ސައިކަލު ވަނީ ވަރަށް ބޮޑަށް ހަލާކުވެފަ އެވެ.

އެރަށުން "ހުރިހާ" އާ ވާހަކަ ދެއްކި މީހަކު ބުނީ ލ. ގަމު މަތިމަރަދޫ އަވަށާއި މުކުރިމަގު އަވަށް ދެމެދު ހައިވޭގައި ސައިކަލާއި ކާރު ޖެހުނީ ސައިކަލު ހައިވޭ މެދުގައި މަޑުކޮށްގެން ތިބުމުގެ ސަބަބުން ކަމަށެވެ.

އަދި އެކްސިޑެންޓު ހިނގި ސަރަހައްދަކީ ލައިޓްތައް ހަލާކުވެފައި ހުރުމުގެ ސަބަބުން ވަރަށް އަނދިރިކޮށް އޮންނަ ސަރަހައްދެއް ކަމަށްވެސް އޭނާ ބުންޏެވެ.

"ސައިކަލް ހައިވޭގައި މަޑުކުރީ އެއްޗެއް ވެއްޓުމުން ހޯދަން ކަމަށްވަނީ" އޭނާ ބުންޏެވެ.

ހައިވޭ ތަކަކީ ބާރު ސްޕީޑްގައި އުޅަނދު ދުއްވާ ސަރަހައްދަކަށް ވާއިރު، ހައިވޭ މެދަށް ސައިކަލް މަޑުކުރުމަކީ ޓްރެފިކް ގަވައިދާ ހިލާފު ކަމެކަން ފާހަގަކޮށްލެވެ އެވެ. އަދި ލާމު ލިންކް ރޯޑަކީ އެކި ސަރަހައްދުތަކުގައި ދުއްވުމަށް ވަކި ސްޕީޑްތަކެއް ކަނޑައަޅާފައިވާ މަގެކެވެ.

މި މައްސަލަ ތަހުގީގު ކުރަމުންދާ ކަމަށް ފުލުހުން ބުންޏެވެ.