އެޕްރީލް 30، 1943 ވަނަ ދުވަހު ސްޕޭންގެ މަސްވެރިއަކަށް ގޮނޑު ދޮށަށް ލައްގާފައި އޮތް މީހެއްގެ ހަށިގަނޑު ފެނުނެވެ. ވަގުތުން ކަމާ ބެހޭ ފަރާތްތަކަށް އެ ވާހަކަ އެންގި އެވެ. އަޅާފައި ހުރި ހެދުމާ ހަށިގަނޑާ އެކު ފެނުނު ޑޮކިއުންމެންޓްތަކުގެ އަލީގައި މަރުވެފައި އޮތް މީހާއަކީ އިނގިރޭސި ނޭވީގެ ކެޕްޓަން މޭޖާ ވިލިއަމް މާޓިން ކަން ދެނެގަންނަން މާގިނަ ވަގުތެއް ނުނެގި އެވެ. އެއީ ދެވަނަ ބޮޑު ހަނގުރާމައިގެ އެންމެ ހޫނު ގަދަ ދުވަސްވަރެވެ. ސްޕޭނަކީ ހަނގުރާމައިގައި ވަކި ކޮޅަކަށް ނުޖެހޭ ގައުމެކެވެ.

ކެޕްޓަން ވިލިއަމް މާޓިންގެ ހަށިގަނޑު ސްޕޭނުން ފެނުނުކަން އެނގުމާ އެކު އިނގިރޭސިވިލާތުން އަވަސް ވެގަތީ އެ ހަށިގަނޑާ އެކު ފެނުނު ކަމަށް ބުނާ ޑޮކިއުމެންޓްތައް ހޯދާށެވެ. އެ ޑޮކިއުމެންޓުގައި އޮތް ކަމަށް ވަނީ އިނގިރޭސިންނާއި އެމެރިކާގެ ގުޅިފައި އޮތް ލަޝްކަރުން ސައިޕްރަސް ހިފުމަށް ރާވައިފައި އޮތް ޕްލޭންގެ ފުރިހަމަ ތަފުސީލެވެ.

އިނގިރޭސި ވިލާތުން އެހާ އަވަހަށް އެ ޑޮކިއުމެންޓްތައް ހޯދަން މަސައްކަތް ކުރީ އެހެން ވެގެންނެވެ. އެހެން ނަމަވެސް އޭރު ސްޕޭނުން ގެންދިޔައީ ވަކި ފަރާތަކަށް ނުޖެހޭ ބައެއް ކަމަށް ބޭރު ފުށުން ދެއްކި ނަމަވެސް އަޑިއަޑިން ޖަރުމަނަށް ޖާސޫސް ކޮށްދެމުންނެވެ. އެހެން ކަމުން އިނގިރޭސިންގެ ޑޮކިއުމެންޓްގެ ފުރިހަމަ މައުލޫމާތު ޖަރުމަނަށް ދެވުނެވެ.

ސްޕޭނުން ފޮނުވި ޑޮކިއުމެންޓްތައް އޭރު ޖަރުމަނުގެ ވެރިޔާ އެޑޮލްފް ހިޓްލަރުގެ މޭޒު މައްޗަށް ހުށަހެޅުމުން އެ ޑޮކިއުމެންޓްތައް ދިރާސާ ކުރުމަށްފަހު އެ ޕްލޭންގެ އަސްލާ މެދު ހިޓްލަރަށް ޝައްކެއް ނެތް މިންވަރަށް ޔަގީން ވި އެވެ. ނަތީޖާއެއްގެ ގޮތުން އިޓަލީގެ ސިސިލީގައި ތިބި ޖަރުމަނުގެ ސިފައިންގެ ތެރެއިން ބޮޑު ބައެއް ސައިޕްރަސްއަށް ފޮނުވައި ސައިޕްރަސްގެ ދިފާއު ވަރުގަދަ ކުރި އެވެ.

އިނގިރޭސިންގެ ޕްލޭނަށް ބަލައި ހިޓްލަރު ހަނގުރާމައިގެ ކުޅިބައި އަތުރަމުން ދިޔައިރު ލަންޑަންގައި އިނގިރޭސި ބޮޑުވަޒީރު ވިންސްޓަން ޗާޗިލް ރާވަމުން ގެންދިޔައީ މުޅިން ތަފާތު ކުޅިބައެކެވެ.

ދެވަނަ ބޮޑު ހަނގުރާމައިގައި ޖަރުމަނުން ކުރަމުން ގެންދިޔަ ހަނގުރާމައިގައި ޔޫރަޕުން އެ ގައުމާއެކު އޮތް އެންމެ ބާރުގަދަ ގައުމަކީ އިޓަލީ އެވެ. ޖަރުމަނުން ފްރާންސް ހިފައި އެގައުމުގެ ބޮޑު ބައެއް ކޮންޓްރޯލް ކުރަން ފެށި ހިސާބުން ހަނގުރާމައިގެ ކުޅިބައި އިނގިރޭސިންނަށް ގެއްލުނު ކަމަށް ހީވި އެވެ. އެހެން ނަމަވެސް ރޫސީވިލާތާއި އިނގިރޭސި ވިލާތާއެކު އެމެރިކާ ގުޅުމުގެ ސަބަބުން ހަނގުރާމައިގެ މިސްރާބު ބަދަލުވެ ހުޅަނގު އެފްރިކާގެ ގައުމުތައް އިއްތިހާދުގެ އަތް ދަށަށް އަ އެވެ.

އެ ހިސާބުން އިއްތިހާދުން ބޭނުން ވީ ޔޫރަޕް ހިފުމަށެވެ. އެކަމަށްޓަކައި ރޭވި ރޭވުމުގެ ދަށުން އިޓަލީގެ ރަށެއް ކަމަށްވާ ސިސިލީ ހިފުމަކީ ފުރަތަމަ ފިޔަވަޅު ކަމަށް ނިންމި އެވެ. ސިސިލީގެ ސްޓްރީޓެޖިކް މުހިންމު ކަމާ ހެދި ޖަރުމަނުން އެ ރަށް ވަރަށް ބޮޑަށް ބަލަހައްޓަމުން ގެންދިޔަ އެވެ. އެހެންކަމުން އިއްތިހާދަށް ސިސިލީ ހިފުމަކީ ފަސޭހަކަމެއް ނޫން ކަމަށް ފެނުނެވެ.

އެ ދަނޑިވަޅުގައި ރޯޔަލް މެރިންގެ އިންޓެލިޖެންސް އޮފިސަރަކާ ރޯޔަލް އެއާފޯސްގެ އޮފިސަރެއް ގުޅިގެން ހުށަހެޅި އޮޅުވާލުމުގެ ޕްލޭން އިނގިރޭސި ސަރުކާރުގެ އެންމެ މަތީ ފަރާތްތަކަށް ހުށަހެޅި އެވެ. ހުށަހެޅި ކަރުދާސްތައް ދިރާސާ ކުރެއްވުމަށް ފަހު އެންމެ ފަހުގެ ރުހުން ދެއްވީ ސީދާ ޗާޗިލް އެވެ. އެ ޕްލޭނަށް ދިން ނަމަކީ އޮޕަރޭޝަން މިންސް މީޓެވެ.

ޗާޗިލްގެ ރުހުމާއެކު އިނގިރޭސި ދެ އޮފިސަރުން ޖަރުމަނަށް އޮޅުވާލުމުގެ ގޮތުން ވަރުގަދަ ޕްލޭނެއް ރޭވި އެވެ. އެކަމަށްޓަކައި މަރުވެފައި އޮތް މީހަކު ހޯދި އެވެ. ހޯދީ އިނގިރޭސި ވިލާތުގެ މަގު މަތީގައި ދިރިއުޅެމުން ދިޔަ ގެދޮރު ނެތް މީހެއްގެ މަރުވެފައި އޮތް ހަށިގަނޑެވެ. އޭނާ މަރުވީ މީދާ ވިހަ ވެގެންނެވެ. އެ ހަށިގަނޑު އިނގިރޭސި ވިލާތުގެ މަނަވަރަކަށް ގެންދިއުމަށްފަހު އޭނާގެ އިސްކޮޅަށް ފެތޭ ގޮތަށް ކެޕްޓަނެއްގެ ޔުނިފޯމު ތައްޔާރު ކުރި އެވެ. ޔުނިފޯމުގެ ޖީބުގެ ތެރެއަށް ލައިޓަރަކާއި ލޯބީގެ ސިޓީތަކެއް ލުމަށްފަހު ސައިޕްރަސް ހިފުމަށް ރާވާފައި އޮތް ފޭކް ޕްލޭނެއް ހަށިގަނޑާއެކު ދާނެ ގޮތަށް ތައްޔާރު ކުރި އެވެ. އެއަށްފަހު ސަބްމެރީނެއްގައި ގެންގޮސް ސްޕޭންގެ ކަނޑުއޮޅިއެއްގެ ތެރެއަށް ހަށިގަނޑު ދޫކޮށްލީ އެވެ.

އިނގިރޭސިން ރޭވި ރޭވުމާ އެއްގޮތަށް ހުރިހާ ކަމެއް ދިޔަ އެވެ. ހިޓްލަރުގެ ލަޝްކަރު ސައިޕްރަސްގެ ސަލާމަތީ ބާރު ވަރުގަދަ ކުރުމަށްޓަކައި ސިސިލީން ސިފައިން ބޭލުމާއެކު ދަނޑިވަޅު ބަލާފައި އިނގިރޭސި ވިލާތާއި އެމެރިކާ އާއި ކެނެޑާއިގެ ސިފައިން ސިސިލީ އަށް ހަމަލަދީ އެ ރަށް ހިފި އެވެ.

ސިސިލީ އަތް ދަށުވުމަކީ އިއްތިހާދަށް ޔޫރަޕްގެ ބައްރަށް އަރައިގަންނަން ލިބުނު ބާރަކަށް ވުމުގެ އިތުރުން މުސޮލީނީގެ އިޓަލީ ބަލި ކުރުމަށް ލިބުނު ހިތްވަރަކަށް ވެސް ވި އެވެ. ސިސިލީ އަށް ދިން ހަމަލާ ކާމިޔާބު ވުމުގެ ފަހަތުގައި ވަނީ އޮޕަރޭޝަން މިންސް މީޓެވެ. އެއީ އިނގިރޭސިންގެ ހިޔަޅު ބުއްދީގެ އަރާހުރި މިސާލެކެވެ.