ާލޭ ގެއެއްގައި ރޭ މެންދަމު އަލިފާން ރޯވެ، ބޮޑެތި ގެއްލުންތަކެއް ލިބިއްޖެ އެވެ.

އަލިފާނުގެ ހާދިސާ ހިނގާފައިވަނީ މއ. ސިޓީވިލާގަ އެވެ.

އެމްއެންޑީއެފުން ބުނި ގޮތުގައި މއ. ސިޓީވިލާގައި ރޯވި އަލިފާން، އެމްއެންޑީއެފް ފަޔާ އެންޑް ރެސްކިޔު ސާވިސް، މާލޭ ފަޔާ ސްޓޭޝަނުން ފަތިހު ވަނީ ނިއްވާލައިފަ އެވެ.

މީހުން ދިރިއުޅޭ އެ ގޭގައި ހިނގި މި ހާދިސާގެ ރިޕޯޓް ރޭ ދަންވަރު 03:06 ހާއިރު އެމްއެންޑީއެފް ފަޔާ އެންޑް ރެސްކިޔު ސާވިސްއަށް ލިބުނު ކަމަށް އެމްއެންޑީއެފުން ބުންޏެވެ.

އަދި މާލޭ ފަޔާ ސްޓޭޝަނުގެ ފަޔާފައިޓަރުން އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ކޮށްފައިވާ ކަމަށާއި އެގޮތުން، ރޯވި އަލިފާން ފަތިހު 04:12 ހާއިރު ވަނީ އެއްކޮށް ނިއްވާލެވިފައި ކަމަށް އެމްއެންޑީއެފުން ބުންޏެވެ.

އަލިފާނުގެ ހާދިސާގައި އެގޭގައި ދިރިނޫޅެވޭވަރަށް ވަނީ ހަލާކުވެފައި --- ފޮޓޯ: އެމްއެންޑީއެފް

މި ހާދިސާގައި އެ ގޭގެ އެކިބައިތަކަށް ގެއްލުން ލިބުނު ނަމަވެސް އެއްވެސް މީހަކަށް އަނިޔާއެއް ވިކަމުގެ ރިޕޯޓު ލިބިފައި ނުވާ ކަމަށް އެމްއެންޑީއެފުން ބުންޏެވެ.

ހާދިސާއާ ގުޅިގެން އެގެއަށް ދިރިނޫޅެވޭ ވަރުގެ ބޮޑެތި ގެއްލުންތަކެއް ވަނީ ވެފައި ވާތީ، އާއިލާއަށް ބޭނުންވާ ކެއިން ބުއިމާއި ވަގުތީ ބޯހިޔާވަހިކަމުގެ އެހީތެރިކަން ފޯރުކޮށްދީފައި ވާކަމަށް ނެޝަނަލް ޑިޒާސްޓާ މެނޭޖްމަންޓް އޮތޯރިޓީން ވަނީ ބުނެފަ އެވެ.