ދުނިޔޭގެ އެންމެ ބޮޑު ފުޓްބޯޅަ މުބާރާތް ކަމަށްވާ "ފީފާ ވޯލްޑް ކަޕް 2026" އެމެރިކާ، ކެނެޑާ އަދި މެކްސިކޯގައި ފެށިގެން ކުރިއަށްދާއިރު، މިއީ ފުޓްބޯޅަ ސަޕޯޓަރުންނަށް ކިތަންމެ ފޯރިގަދަ މުބާރާތަކަށް ވިޔަސް، ދުނިޔޭގެ މޫސުމަށް މިއިން ކުރާނެ ނޭދެވޭ އަސަރު ވަރަށް ބޮޑެވެ.

ތިމާވެށީގެ ދިރާސާ ކުރާ ބައިނަލްއަގުވާމީ ޖަމްއިއްޔާތަކުން ހާމަކޮށްފައިވާ ގޮތުގައި، މިއަހަރުގެ ވޯލްޑް ކަޕަކީ މުޅި ފުޓްބޯޅަ ތާރީހުގައިވެސް އެންމެ ގިނައިން ކާބަން ބޭރުކުރާ އަދި ތިމާވެއްޓަށް އެންމެ ނުރައްކާތެރި ކުޅިވަރު މުބާރާތެވެ.

މި މުބާރާތް ތިމާވެށީގެ "ބިރުވެރި ހީލަތަކަށް" ވާން ދިމާވި މައިގަނޑު ސަބަބުތަކުގެ ތެރޭގައި:

1. ވައިގެ ދަތުރުފަތުރުގެ ބޮޑު ކާބަން ފުޓްޕްރިންޓް

މި ފަހަރުގެ ވޯލްޑް ކަޕްގެ އެންމެ ބޮޑު ތިމާވެށީގެ މައްސަލައަކީ ދަތުރުފަތުރެވެ. މުބާރާތް ބާއްވަނީ މުޅި އުތުރު އެމެރިކާ ބައްރަށް ފެތުރިގެންދާ ގޮތަށް ތިން ގައުމެއްގެ 16 ސިޓީގަ އެވެ.

ވައިގެ މަގުން ދިގު ދަތުރުތައް: ކުޅުންތެރިންނާއި، އޮފިޝަލުންނާއި، އަދި މިލިއަނުން ބެލުންތެރިން މެޗުތައް ބެލުމަށްޓަކައި އެއް ސިޓީން އަނެއް ސިޓީއަށް (މިސާލަކަށް ކެނެޑާގެ ޓޮރޮންޓޯއިން އެމެރިކާގެ ލޮސް އެންޖެލިސްއަށް) ދަތުރު ކުރަން ޖެހެނީ ވައިގެ މަގުންނެވެ.

85% އަށްވުރެ މަތީ ދަރަޖައެއް: ދިރާސާތަކުން ދައްކާ ގޮތުގައި މި މުބާރާތުން އުފެދޭ ޖުމްލަ ކާބަން އެމިޝަންގެ ގާތްގަނޑަކަށް %85 އާއި %87 އާ ދެމެދުގެ މިންވަރެއް ހިއްސާކުރަނީ ހަމައެކަނި ވައިގެ ދަތުރުފަތުރުންނެވެ. މިއީ މީގެ ކުރީގެ އެއްވެސް މުބާރާތެއްގައި ދަތުރުފަތުރަށް މިހާ ބޮޑު ހަކަތައެއް ހޭދަވި ފުރަތަމަ ފަހަރެވެ.

2. ކުރީގެ 4 މުބާރާތާ އަޅާބަލާއިރު ދެގުނަ އިތުރުވުން

ސައިންސްވެރިން އަންދާޒާ ކުރާގޮތުގައި 2026 ގެ ވޯލްޑް ކަޕުން ނުވަ މިލިއަން ޓަނުގެ ކާބަން ޑައިއޮކްސައިޑް ޖައްވަށް ބޭރުވެގެންދާނެ އެވެ.

ބޮޑު އަޅާކިޔުމެއް: މި މިންވަރަކީ 2010 އިން ފެށިގެން 2022 އާ ހަމައަށް ބޭއްވުނު ފަހުގެ 4 ވޯލްޑް ކަޕް (ދެކުނު އެފްރިކާ، ބްރެޒިލް، ރަޝިޔާ، އަދި ގަތަރު) މުބާރާތްތަކުގެ އެވްރެޖް ކާބަން އެމިޝަނާ އަޅާބަލާއިރު ބަރާބަރު ދެގުނަ އިތުރު މިންވަރެކެވެ. މިއީ މުޅި ސްވިޒަލޭންޑް ގައުމުގެ ސިނާއީ ދާއިރާއިން އަހަރެއްގެ މައްޗަށް ބޭރުކުރާ ކާބަންއާ އެއްވަރުގެ ބޮޑު އަދަދެކެވެ.

3. މުބާރާތް ބޮޑުކުރުން

32 ޓީމުން 48 ޓީމަށްމި ފަހަރުގެ ވޯލްޑް ކަޕަކީ ތާރީހުގައިވެސް އެންމެ ގިނަ ޓީމު ވާދަކުރާ މުބާރާތެވެ. ފީފާއިން ވަނީ މުބާރާތުގެ ފޯމެޓް 32 ޓީމުން 48 ޓީމަށް ބަދަ ލުކޮށްފަ އެވެ.

މީގެ ސަބަބުން މެޗުތަކުގެ އަދަދު 64 އިން 104 މެޗަށް އިތުރުވެ މެޗުތައް ގިނަވުމުން ދަނޑުތަކުގެ އޮޕަރޭޝަންތަކާއި، ހޮޓާ އަދި އެކޮމޮޑޭޝަންތަކުގެ ބޭނުން ބޮޑުވެ، ކާބަން އިތުރުވުމަށް ސީދާ މަގުފަހިވެ އެވެ.

4. ފެނުގެ ބޮޑު އިސްރާފާއި ދަނޑުތަކުގެ ހޫނުމިން

އެމެރިކާގެ ގިނަ ދަނޑުތަކަކީ އާންމުކޮށް އެމެރިކަން ފުޓްބޯޅަ ކުޅެން އާޓިފިޝަލް ވިނަ އަޅާފައި ހުންނަ ދަނޑުތަކެވެ. ނަމަވެސް، ފީފާގެ ގަވާއިދަށް ފެއްތުމަށްޓަކައި މި ހުރިހާ ދަނޑުތަކެއް ވަނީ ގުދުރަތީ ވިނައަށް ބަދަލު ކޮށްފަ އެވެ.

މި ބަދަލުގެ ސަބަބުން މި ހޫނު މޫސުމުގައި ވިނަގަނޑު ދެމެހެއްޓުމަށްޓަކައި ދުވާލެއްގެ މައްޗަށް އެތައް ހާސް ލީޓަރެއްގެ ފެން ދަނޑުތަކަށް ޖަހަންޖެހި، ފެނުގެ ބޮޑު އިސްރާފެއް ދަނީ ކުރެވެމުންނެވެ.

މީގެއިތުރުން، މުބާރާތް ބާއްވާ 16 ސިޓީގެ ތެރެއިން 10 އަށްވުރެ ގިނަ ސިޓީއަކީ މިދުވަސްވަރު އާދަޔާ ހިލާފަށް ހޫނުގަދަ ސިޓީތަކަށް ވުމުން، ދަނޑުތައް ފިނިކުރަން ކުރާ މަސައްކަތުންވެސް ތިމާވެއްޓަށް ބާރުބޮޑުވެ އެވެ.

ފީފާގެ ވައުދުތަކާއި ހަގީގަތް ދިމައެއް ނުވޭ!

ފީފާއިން 2030 ގެ ނިޔަލަށް ކާބަން ބޭރުކުރާ މިންވަރު ދެބައިކުޅަ އެއްބަޔަށް ކުޑަކުރަން ބައިނަލްއަގުވާމީ ގޮތުން ވައުދު ވެފައިވީ ނަމަވެސް، 2026 ގެ ވޯލްޑް ކަޕްގެ އިންތިޒާމުތައް ހުރިގޮތުން އެކަން ހާސިލެއް ނުވެ އެވެ.

ތިމާވެށީގެ މާހިރުން ބުނާގޮތުގައި، މުބާރާތްތައް ބޮޑުކޮށް، ގައުމުތައް ގިނަ ކުރަމުން ދާހާ ހިނދަކު، ދުނިޔޭގެ މޫސުމަށް ދޭ ގެއްލުން ކުޑައެއް ނުކުރެވޭނެ އެވެ.