މި ސަރުކާރުން ފުށިދިއްގަރު ފަޅު ހިއްކައިގެން ތަރައްގީކުރާ ރަސްމާލެ މަޝްރޫއުގެ ބިން ޔޫއޭއީގެ ކުންފުންޏަކަށް ދިނީ 99 އަހަރަށް ނޫން ކަމަށާއި، ދުވަހަކު ވެސް ދިވެހިންނަށް އެތަން އަނބުރާ ނުލިބޭ ގޮތަށް ތާއަބަދަށް ކަން ހާމަވެއްޖެ އެވެ.

ރަސްމާލެ މަޝްރޫއުގެ ދަށުން ހިއްކާ 1,100 ހެކްޓަރުގެ ބިމުގެ ތެރެއިން 500 ހެކްޓަރުގެ ބިން ދީފައިވަނީ ޔޫއޭއީގެ މަޝްހޫރު ކުންފުންޏެއް ކަމަށްވާ އީގަލް ހިލްސް އަށެވެ. އެ ކުންފުނިން މިހާރު ވަނީ ބިދޭސީ މަހުޖަނުންނަށް އަމާޒުކޮށް، ދާއިމީކޮށް ދިރިއުޅެވޭ ގޮތަށް އެ ރަށުގައި ތަރައްގީކުރާ އެޕާޓްމަންޓްތައް ވިއްކުމުގެ މަސައްކަތް ރަސްމީކޮށް ފަށައިފަ އެވެ.

އީގަލް ހިލްސްއަށް މި ބިން ދިނުމަށްޓަކައި އެއްބަސްވުމެއްގައި ސަރުކާރުން ސޮއިކުރީ މިދިޔަ ހޯމަ ދުވަހު އެވެ. މި އެއްބަސްވުމުގެ ތަފުސީލު ހާމަނުކޮށް، ސަރުކާރުން މީގެ ކުރިން ބުނަމުން އައީ އެތަން ދޫކުރީ 99 އަހަރުގެ މުއްދަތަކަށް ކަމަށެވެ. އަދި އެތަން ދީފައިވަނީ އެއްވެސް ލީސް އެކުއިޒިޝަން ކޮސްޓެއް އަދި ކުއްޔެއް ވެސް ނުނަގާ މުޅިން ހިލޭ ކަމަށް ވަނީ އެނގިފަ އެވެ.

ނަމަވެސް، މި އެއްބަސްވުމުގެ ދަށުން އެ ބިން މުޅި އުމުރަށް ވެސް ދިވެހިންނަށް ނުލިބޭނެ ގޮތަށް އޮތްކަން އީގަލް ހިލްސް އިން ހާމަކުރި މައުލޫމާތުން ސާފުވެ އެވެ. އެ ކުންފުނިން މި މަޝްރޫއާ ގުޅޭގޮތުން އާއްމުކޮށްފައިވާ މައުލޫމާތަށް ބަލާއިރު އެތަނުން ވިއްކާ އެޕާޓްމަންޓެއް ނުވަތަ ބިމެއްގެ ފުރަތަމަ 99 އަހަރު ހަމަނުވަނީސް އެހެން ފަރާތަކަށް ވިއްކާލައިފި ނަމަ ނުވަތަ ވާރުތައިން ދީފި ނަމަ، އަލަށް އެތަން ގަންނަ ނުވަތަ ލިބޭ ފަރާތަކަށް އަނެއްކާވެސް އަލުން އިތުރު 99 އަހަރުގެ އާ ކުލީގެ މުއްދަތެއް ފެށިގެންދާނެ އެވެ.

"މިތަނުގެ ޕްރޮޕަޓީސްތައް ކުއްޔަށް ދޭނީ ދިވެހިރާއްޖޭގެ ގާނޫނުތަކުގެ ދަށުން 99 އަހަރަށް. އެތަންތަނުގެ ހައްގުތައް ވިއްކައިގެން ނުވަތަ ވާރުތައިން ވެސް އެހެން ފަރާތަކަށް ބަދަލުކޮށްފި ނަމަ 99 އަހަރުގެ އާ ކުލީގެ މުއްދަތެއް ފެށޭނެ. މީގެ ސަބަބުން އެތަން ގަންނަ ފަރާތްތަކުގެ އަތުގައި އެތައް ޖީލަކަށް އެތަންތަން ދެމިގެންދާނެ،" އީގަލް ހިލްސް އިން ބުނެފައިވެ އެވެ.

ރަސްމާލެއާ ގުޅޭ ގޮތުން ވާހަކަ ދައްކަވަމުން ފިނޭންސް މިނިސްޓަރު ހަސަން ޒަރީރު ވިދާޅުވެފައި ވަނީ އެތަން ދެނީ 99 އަހަރަށް ކަމަށެވެ. އެހެންނަމަވެސް، އެއްބަސްވުމުގެ ދަށުން އެތައް ޖީލަކަށް އެ ބިންތައް ދިވެހިންގެ އަތުން ގެއްލިގެންދާ ގޮތަށް ހަމަޖެހިފައިވާކަން އޭނާ ހާމައެއް ނުކުރައްވަ އެވެ.

ރަސްމާލޭގެ ވާހަކަ ދައްކަވަމުން ރައީސް މުހައްމަދު މުއިއްޒު ވިދާޅުވީ ދުބާއީ ކުންފުންޏަށް އެ ރަށް ދިނުމުން ދިވެހިންގެ އެތައް ޖީލަކަށް ފައިދާވާނެ ކަމަށެވެ.

އެހެންނަމަވެސް، މި އެއްބަސްވުމުގެ ސަބަބުން ދިވެހިރާއްޖޭގެ އަގުހުރި ބިމެއް އަނބުރާ ދައުލަތަށް ނުލިބޭނެ ފަދަ ގޮތަކަށް ބޭރުގެ ފަރާތަކަށް ދާއިމީ ސިފައެއްގައި ދޫކޮށްލެވިފައިވާ ކަމަށް ބުނެ، އާންމުންނާއި ސިޔާސީ އެކި ފަރާތްތަކުގެ މެދުގައި ދަނީ ކަންބޮޑުވުން ފާޅުކުރެވެމުންނެވެ.

މި ލިޔުމާ ގުޅޭ އިތުރު ލިޔުން
Rasmale ebbasvun gaanoona hilaafu, vikkaalanee dhivehinge musthaqbal: Yameen ރަސްމާލެ އެއްބަސްވުމަކީ މުސްތަގުބަލުން ކުރާ ވައްކަމެއް: ޔާމީން
Rasmale vikkaali kunfunin hulhumale gai vikkan 5000 falat alhanee ރަސްމާލެ ވިއްކާލި ކުންފުނިން ހުޅުމާލޭގައި ވިއްކަން ފްލެޓް އަޅަނީ
Rasmale' gai 20 billion dollar ge mashrooeh hingan Abudhabi kunfunyakaa eku soikoffi ރަސްމާލެ އަބޫދާބީގެ ކުންފުންޏަކަށް ވިއްކާލައިފި