ރައީސް މުހައްމަދު މުއިއްޒުގެ އެއްބަނޑު ކޮއްކޯފުޅު އަދި ރައްޔިތުންގެ މަޖިލީހުގެ ނިލަންދޫ ދާއިރާގެ މެންބަރު ފާތިމަތު ސައުދާގެ ބޭންކު އެކައުންޓަށް ޖަމާކުރި 2.4 މިލިއަން ރުފިޔާއަކީ ލޯނެއް ކަމަށް ވިދާޅުވެފައިވީ ނަމަވެސް، އެ ފައިސާ އަނބުރާ ދައްކަންޖެހޭ އެއްވެސް މުއްދަތެއް ކަނޑައަޅާފައި ނުވާކަން އޭނާގެ މާލީ ބަޔާނުން ހާމަވެއްޖެ އެވެ.

ރައްޔިތުންގެ މަޖިލީހުގެ މެންބަރުންގެ މާލީ ބަޔާންތައް އާންމުކޮށްފައިވާއިރު، އާންމު އުސޫލުން މެންބަރުން ނަގާފައިވާ ލޯނުތަކާއި ދަރަނިތަކުގެ ތަފްސީލާއި، އެ ފައިސާ އަނބުރާ ދައްކައި ހަލާސްކުރަންޖެހޭ މުއްދަތުތައް ބަޔާނުގައި ހިމަނަންޖެހެއެވެ. އަދި ބޮޑެތި އަދަދުތަކުން ޖަމާވާ ފައިސާގެ ތަފްސީލު ސާފުކޮށް އެނގެން އޮތުމަކީ އެކަމާ ގުޅޭގޮތުން ސުވާލު އުފެދުމުގެ ފުރުސަތު ކުޑަކޮށްދޭ ކަމަކަށްވާއިރު، ގިނަ މެންބަރުން ވަނީ އެ މައުލޫމާތުތައް ފުރިހަމަކުރައްވާފަ އެވެ.

މެންބަރު ސައުދާގެ އެކައުންޓަށް 2.4 މިލިއަން ރުފިޔާގެ ނަގުދު ފައިސާ ޖަމާކުރި މައްސަލަ އެންމެ ފުރަތަމަ ފެންމަތިވީ މިއަހަރުގެ މާޗު މަހުގެ ތެރޭގަ އެވެ. އެ މައްސަލަ ތިލަވުމުން އޭރު މީޑިއާތަކަށް ސައުދާ ވިދާޅުވެފައިވަނީ، އެއީ ވިޔަފާރިވެރިއެއްގެ އަތުން ނެންގެވި ސްޓޫޑެންޓް ލޯނެއް ކަމަށެވެ. ނަމަވެސް އެކަމާ ގުޅޭ އިތުރު އެއްވެސް ތަފްސީލެއް އޭރު ހާމަކުރައްވާފައެއް ނުވެ އެވެ.

މަޖިލީހަށް ހުށަހެޅުއްވި މާލީ ބަޔާނުން އެނގޭ ގޮތުގައި މި ލޯނު ނަގާފައިވަނީ 1 ޖެނުއަރީ 2026 ގައެވެ. ނަމަވެސް، 2.4 މިލިއަން ރުފިޔާގެ މި ބޮޑު ލޯނު އަނބުރާ ދައްކައި ނިންމަންޖެހޭ ތާރީހު ލިޔަން އޮންނަ ބައިގައި އެއްވެސް ތާރީހެއް ހިމަނާފައެއް ނުވެ އެވެ. މިއާއެކު، އެއްވެސް މުއްދަތެއް ކަނޑަނާޅައި، އަމިއްލަ ފަރުދެއްގެ އަތުން މިހާ ބޮޑު އަދަދެއްގެ ނަގުދު ފައިސާ ލޯނުގެ ގޮތުގައި ދީފާނެތޯ ގިނަ ބަޔަކު ދަނީ ސުވާލު އުފައްދަމުންނެވެ. ހާއްސަކޮށް މި ފައިސާ ޖަމާވެފައިވަނީ އޭރު ބޯމަތިވެފައި އޮތް ލޯކަލް ކައުންސިލް އިންތިހާބާ ދިމާކޮށް ކަމަށްވާތީ މިކަމުގެ ކަންބޮޑުވުން ވަނީ އިތުރުވެފަ އެވެ.

މީގެއިތުރުން، ސައުދާ މާލީ ބަޔާން ހުށަހެޅުއްވި އިރު އެކައުންޓުގައި ހުރި ކަމަށް ބަޔާންކޮށްފައިވަނީ އެންމެ 11،604 ރުފިޔާއާއި 118 އެމެރިކާ ޑޮލަރެވެ. އެހެންކަމުން، ލޯނުގެ ގޮތުގައި ނެންގެވި ކަމަށް ބުނާ 2.4 މިލިއަން ރުފިޔާއަށް ވީގޮތެއް މާލީ ބަޔާނަކުން ސާފެއް ނުވެ އެވެ.

މާލީ ބަޔާނުގައިވާ ގޮތުން، އަހަރެއްގެ މައްޗަށް މުސާރައިގެ ގޮތުގައި ސައުދާއަށް 990،000 ރުފިޔާ ލިބިވަޑައިގަންނަވަ އެވެ. އަދި ބޭންކް އޮފް މޯލްޑިވްސް އިން އޭނާއަށް ދޫކޮށްފައިވާ ވިސާ ޕްލެޓިނަމް ކާޑުގައި 9،861 ޑޮލަރުގެ ލިމިޓެއް އޮތް ކަމަށްވެސް އެ ބަޔާނުގައި ފާހަގަކޮށްފައިވެ އެވެ.