މިއަދުގެ ދުނިޔޭގައި ޓެކްނޮލޮޖީގެ މާހައުލާއި އިންޓަނެޓުގެ ވަސީލަތްތައް މެދުވެރިކޮށް އެކަކު އަނެކަކާ ގުޅުން ބަދަހި ކުރުން ފަސޭހަވެފައިވީ ނަމަވެސް، އެކަނިވެރިކަން އިހުސާސްކުރާ މީހުންގެ އަދަދު އަންނަނީ ދުވަހުން ދުވަހަށް އިތުރުވަމުންނެވެ.

މަޝްހޫރު ނަފްސާނީ އިލްމުވެރިޔާ އަދި "ގްރިޓް" ފޮތުގެ މުސަންނިފު އެންޖެލާ ޑަކްވާތު ވިދާޅުވާ ގޮތުގައި، އެކަނިވެރިކަމަކީ ހަމައެކަނި އިންސާނާގެ ސިކުނޑީގެ ތެރޭގައި އުފެދޭ ނަފްސާނީ މައްސަލައެއް ނޫނެވެ.

އެހެނެއް ކަމަކު އެއީ އެމީހަކު ދިރިއުޅޭ މާހައުލާއި، ވަށައިގެންވާ ނިޒާމުތަކާ ސީދާ ގުޅިފައިވާ "ސިޗުއޭޓެޑް" ނުވަތަ މާހައުލީ ކަމެކެވެ.

ސީއެންއެންގައި ޝާއިއު ކޮށްފައިވާ ލިޔުމެއްގައި އެންޖެލާ ބުނެފައިވަނީ ދުޅަހެޔޮ ސިއްހަތަކާއި އުފާވެރި ދިރިއުޅުމަކަށް "ސިޗުއޭޓެޑް ވެލްނެސް" ނުވަތަ އެމީހަކު އުޅޭ މާހައުލަކީ އިންސާނީ ގުޅުންތަކަށް މަގުފަހި ކޮށްދޭ ތަނަކަށް ހެދުން ނުހަނު މުހިންމެވެ.

ޑިޖިޓަލް ގުޅުންތަކާއި އަސްލު އެކަނިވެރިކަން

ޒަމާނީ ދުނިޔޭގައި ސޯޝަލް މީޑިއާއާއި އާޓިފިޝަލް އިންޓެލިޖެންސްގެ ސަބަބުން މީހުންނާ މުއާމަލާތް ކުރުން ފަސޭހަ ވެފައިވީ ނަމަވެސް، އެއީ "ސައްހަ" ނުވަތަ ހަގީގީ އިންސާނީ ގުޅުމެއް ނޫނެވެ.

ޑަކްވާތު ފާހަގަ ކުރައްވާ ގޮތުގައި، ޓެކްނޮލޮޖީން އިހުސާސް ކޮށްދެނީ ގާތްކަމުގެ ވަހުމެކެވެ. އެހެން ނަމަވެސް، އިންސާނާގެ ސިކުނޑި އުފެދިފައިވަނީ ބިންގާ ވަރުގަދަ، އެކަކު އަނެކަކާ ސީދާ ބައްދަލުވެ ކުރެވޭ މުއާމަލާތްތަކަށް ބޭނުންވާ ގޮތަށެވެ.

އެކަނިވެރިކަމުން ސަލާމަތްވުމަށް މާހައުލު ބަދަލު ކުރުން

އެކަނިވެރިކަން ހައްލުކުރުމަށްޓަކައި ހަމައެކަނި ވިސްނުން ބަދަލު ކޮށްލުމަކުން ނުފުދެ އެވެ. ޑަކްވާތު ހުށަހަޅުއްވަނީ އަންނަނިވި ކަންކަމަށް ސަމާލުކަން ދިނުމަށެވެ.

  1. އުޅޭ މާހައުލު ބައްޓަން ކުރުން: ދިރިއުޅޭ ގޭތެރެއާއި ވަޒީފާ އަދާކުރާ އޮފީސް ފަދަ ތަންތަނަކީ މީހުންނާ ސީދާ ބައްދަލުވެ، ވާހަކައްކައި، ގުޅުން ބަދަލު ކުރެވޭނެ ފަދަ ގޮތަކަށް ރޭވިފައިވާ ތަންތަނަށް ހެދުން.
  2. ސްކްރީންތަކާ ދުރުވުން: ޓެކްނޮލޮޖީގެ މައްޗަށް ބަރޯސާވުން ކުޑަކޮށް، އާއިލާއާއި ރައްޓެހިންނާއެކު "ފޭސް-ޓު-ފޭސް" ވަގުތު ހޭދަ ކުރުން.
  3. އިޖުތިމާއީ ހަރަކާތްތަކުގައި ބައިވެރިވުން: މުޖުތަމައުގެ ތެރޭގައި ބޭއްވޭ އެކި ހަރަކާތްތަކުގައި ބައިވެރިވެ، ހަގީގީ އިންސާނީ ގުޅުންތައް އާލާކުރުން.

އެކަނިވެރިކަމަކީ ހިތުގެ ބަލިތަކާއި، ޑިމެންޝިއާ އަދި ނަފްސާނީ އެކި މައްސަލަތަކަށް މަގުފަހިކުރާ ކަމަކަށްވާތީ، މުޖުތަމައުގެ ތެރޭގައި އެކަކު އަނެކަކާ އޮންނަ ގުޅުން ބަދަހިކޮށް، އުޅޭ މާހައުލަކީ އިންސާނީ ގުޅުންތަކަށް ފަހި ތަނަކަށް ހެދުމަކީ މުޅި ސިއްހަތަށް އޮތް އެންމެ ބޮޑު ރައްކާތެރިކަން ކަމަށް ޑަކްވާތު ބަޔާން ކުރައްވަ އެވެ.