މުމްބާއީގެ ކޯރެއް ކަމަށްވާ މީތީ ކޯރާ ގުޅުންހުރި ހިޔާނާތުގެ މައްސަލައެއްގައި ބޮލީވުޑްގެ އެކްޓަރު ޑިނޯ މޯރެއާ ހައްޔަރު ކޮށްފި އެވެ.

މުމްބާއީ ފުލުހުންގެ އިކޮނޮމިކް އޮފެންސަސް ވިންގް (އީއޯޑަބްލިއު) އިން އޭނާ ހައްޔަރު ކޮށްފައިވަނީ ބެންޑްރާގައި ހުންނަ އޭނާގެ ގޭގައި ގާތްގަނޑަކަށް 8 ގަޑިއިރު ވަންދެން ސުވާލު ކުރުމަށްފަހުގަ އެވެ.

މި މައްސަލައަކީ މުމްބާއީގެ މީތީ ކޯރު ސާފު ކުރުމާއި އާލާކުރުމުގެ މަޝްރޫއުތަކާ ގުޅިގެން ހިންގާފައިވާ މާލީ މަކަރާއި ހީލަތުގެ މައްސަލައެކެވެ.

ތަހުގީގުކުރާ ފަރާތްތަކުން ބަލަމުން ދަނީ ކޮންޓްރެކްޓަރުންނާއި، މެދުވެރިން އަދި ސިޓީ ކައުންސިލް (ބީއެމްސީ)ގެ އޮފިޝަލުންގެ ބައިވެރިވުމެވެ. މި މައްސަލައިގައި ބީއެމްސީއަށް 65.54 ކްރޯޑް ރުޕީސްގެ ގެއްލުމެއް ވެފައިވާ ކަމަށް ރިޕޯޓްތައް ބުނެ އެވެ.

މި މައްސަލައާ ގުޅިގެން މީގެ ކުރިންވެސް ޑިނޯއާ ވަނީ ސުވާލުކޮށްފަ އެވެ. އެގޮތުން 2025 ވަނަ އަހަރުގެ މެއި މަހުގެ ތެރޭގައި ދީނޯއާއި އޭނާގެ ބޭބެ ސަންތީނޯ މޯރެޔާއާ އީއޯޑަބްލިއުއިން ސުވާލު ކޮށްފައިވަނީ، ތަހުގީގަށް ފާހަގަ ކުރެވުނު މީހުންނާ ފޯނުން ގުޅާފައިވާ ރެކޯޑުތަކެއް ފެނުމުންނެވެ.

އެއާއެކު ސަންތީނޯގެ ކުންފުނި "ޔޫބީއޯ ރައިޑްޒް" އާއި މި މައްސަލައިގައި ތުހުމަތު ކުރެވޭ މީހުންނާ ދެމެދު ހިންގާފައިވާ މާލީ މުއާމަލާތްތައްވެސް ތަހުގީގު ޓީމުން ދަނީ ބަލަމުންނެވެ.

މީގެ އިތުރުން، އެންފޯސްމަންޓް ޑައިރެކްޓްރޭޓް (އީޑީ) އިންވެސް ވަނީ މި މައްސަލައިގެ ތަހުގީގަށް ޑިނޯގެ ގޭގެ އިތުރުން އެހެން ބައެއް ތަންތަން ފާސްކޮށްފަ އެވެ.