އައިޝްވާރްޔާ ރާއީ ބައްޗަންއަކީ ބޮލީވުޑް ތަރިންގެ ތެރެއިން އެންމެ ރީތި ކަމަށް ގިނަ ބަޔަކު ގަބޫލުކުރާ ތަރި އެވެ. 1994 ވަނަ އަހަރު މިސް ވޯލްޑްގެ ތާޖު އުފުލާލާފައިވާ އައިޝްވާރްޔާ ވަނީ އޭނާއަށް މޮޑެލިންގެ ދާއިރާއަށް ނުކުމެވުނު ގޮތާ ބެހޭ ގޮތުން އިންޓަވިއުއެއްގައި ވާހަކަ ދައްކާފަ އެވެ.

އެގޮތުން އޭނާއަށް ލިބުނު އެންމެ ފުރަތަމަ ފުރުސަތަކީ ކޮލެޖްގައި އުޅުނުއިރު ކިޔަވައިދިން ޕްރޮފެސަރަކު ދިން ފުރުސަތެއް ކަމަށް އޭނާ ބުންޏެވެ. އެ ޕްރޮފެސަރަކީ މެގަޒިންއަކަށް ފޮޓޯ ޖާނަލިސްޓެއްގެ ގޮތުގައި މަސައްކަތް ކުރާ ފަރާތަކަށްވުމާއެކު ފެޝަން ކޮލަމްއަށް މޮޑެލް ކުރުމަށް އޭނާ އައިޝްވާރްޔާއަށް ދިން ފުރުސަތުގައި އޭނާ ހިފީ އެވެ.

މިސް ވޯލްޑް ލިބުމުގެ ކުރިން ދީފައިވާ މި އިންޓަވިއުގައި އައިޝްވާރްޔާ އިތުރަށް ބުނީ ގިނަ މޮޑެލުންތަކެއްގެ ތެރެއިން އޭނާ ފާހަގަ ވަނީ އޭނާގެ ސިފަ އާއި ބުރު ސޫރަ އިން ކަމަށެވެ. ނަމަވެސް ގިނަ ފުރުސަތުތައް ލިބެން ފެށީ މިސް ވޯލްޑް ލިބުމަށް ފަހު ކަމަށް އޭނާ ބުންޏެވެ.

އޭނާގެ ނޫކުލައިގެ ލޮލާއި އިސްތަށިގަނޑުގެ ކުލައިގެ ސަބަބުން ގިނަ ބައެއްގެ ސަމާލުކަން ލިބުނު ކަމަށް ބުނަމުން އައިޝްވާރްޔާ ވަނީ މިސް ވޯލްޑްގެ ތާޖު ލިބުންވީ ބޮޑު އުފަލެއް ލިބުނު ކަމެއް ކަމުގައި ފާހަގަ ކޮށްފަ އެވެ.

ފިލްމީ މަސައްކަތްތަކަށް ބަލާލާއިރު އައިޝްވާރްޔާ ދެން އެންމެ އަވަހަށް ފެންނާނެ ކަމަށް ބެލެވެނީ ތަމިލް ފިލްމެއް ކަމަށްވާ "ޕޮންނިޔިން ސެލްވަން" ގައި ނެގެޓިވް ރޯލަކުންނެވެ.