ފާއިތުވި ދޮޅު އަހަރުގެ ތެރޭގައި އަހަރުމެންނަށް އެންމެ އާއްމުކޮށް އިވުނު އެއް އަޑަކީ ވޯކް ފްރޮމް ހޯމް ނުވަތަ ގޭގައި ތިބެގެން މަސައްކަތް ކުރުމުގެ އަޑެވެ.

އިޖުތިމާއީ ގައިދުރުކަން ގެންގުޅެންޖެހޭ މި ހާލަތުގައި ގިނަ ބަޔަކު ދަނީ ގޭގައި ތިބެ ވަޒީފާގެ ހުރިހާ މަސައްކަތެއް ކުރަމުންނެވެ. މިއާއެކު އަހަރުމެންނަށް އެތައްގިނަ އަހަރުމެންނަށް ލުއި ފަސޭހަތަކެއް ލިބިފައިވެ އެވެ. ނަމަވެސް ގޭގައި ތިބެގެން މަސައްކަތް ކުރުމުގައި ވެސް ދުރުވާންވީ ގިނަ އާދަތަކެއް އެބަ ހުއްޓެވެ.

ސީދާ ވަޒީފާގެ ގަޑިއަށް ހޭލުން:

މިއީ ގޭގައި މަސައްކަތް ކުރާއިރު އާއްމުކޮށް ފެންނަ އާދަ އެކެވެ. އޮފީހަށް ދާން ނުޖެހޭތީ ނިދިން ހޭލަނީ ސީދާ އޮފީހުގެ ގަޑިއަށެވެ. ނަމަވެސް މިއީ އެންމެ ރަނގަދޅު ގޮތް ނޫންކަން ގަބޫލު ކުރަންޖެހެ އެވެ. ނިދާ ހޭލުމާއެކު މަސައްކަތް ކުރަން ފަށާނަމަ ނަފްސާނީ ގޮތުން ވަޒީފާގެ މަސައްކަތަށް ތައްޔާރު ވާން ފުރުސަތެއް ނުލިބެ އެވެ. ނަތީޖާއަކީ މަސައްކަތަށް ފަރުވާ ކުޑަވެ ގޯސް ހެދުމެވެ. އޭގެ ބަދަލުގައި ވަގުތު އޮއްވާ ހޭލައި މަސައްކަތަށް ތައްޔާރުވެ ރަނގަޅު ނާސްތާއެއް ކުރާށެވެ.

ހެލިފެލިވެ އުޅުން މަދުވުން:

ގޭގައި ތިބެގެން މަސައްކަތް ކުރުމުގެ ފުރުސަތު ލިބުމާއެކު ދިރިއުޅުމަށް އައި މައިގަނޑު އެއް ބަދަލަކީ ހެލިފެލިވެ އުޅުން މަދުވުމެވެ. އޮފީހަށް ދާންޖެހޭ ޖެހުން ހުއްޓުމަކަށް އައުމާއެކު ދުވާލު ގިނަ ބަޔަކަށް ލިބޭ ހަމައެކަނި ހެލިފެލިވެ އުޅުމުގެ ފުރުސަތު ވަނީ ގެއްލިފަ އެވެ. އެއާއެކު އެއްތަނެއްގައި ގިނަ އިރު އިނދެ ލޮޑުވުމާއި ބަރުދަން އިތުރުވުމަށް މަގުފަހިވެ އެވެ.

މަސައްކަތް ދިގު ދެއްމުން:

އެއްވެސް ޝައްކެއް ނެތް ގޮތުގައި ގެއިން މަސައްކަތް ކުރަން ލިބުމަކީ މަސައްކަތަށް ވެސް ލިބުނު ބޮޑު ފަސޭހަ އެކެވެ. ބޭނުން ގަޑިއެއްގައި މަސައްކަތުގެ ކަންކަން ކުރެވޭނެ އެވެ. ކުއްލި ހާލަތެއް ކުރިމަތިވެއްޖެ ނަމަ ވަގުތުން ހައްލު ކުރެވޭނެ އެވެ. ނަމަވެސް ވިސްނާލަންވީ ވަޒީފާގެ މަސައްކަތްއް މުޅި ދުވަހަށް ދިގު ދެމިޔަ ނުދިނުމަށެވެ. ގޭގައި މަސައްކަތް ކުރާއިރު ވެސް ދިރިއުޅުމުގެ އެހެން ކަންކަމަށް ވެސް ވަގުތު ހުސް ކުރަން ޖެހޭނެ އެވެ.

ގޭގައި ތިބެގެން މަސައްކަތް ކުރަން ލިބިފައިވާ މި ފުރުސަތަކީ ތިމާގެ ސިއްހަތަށާއި އާއިލީ ގުޅުންތަކަށް ބުރުއަރާ ކަމަކަށް ވިޔަ ނުދިނުމަށްޓަކައި މި ދެންނެވުނު ކަންކަމަށް ސަމާލުވާށެވެ.