ކޯޕަން ހޭގަން (25 ޖޫން) - ހައްގޭރީއަށް ޔޫރަޕިއަން ޔޫނިއަންގައި މިހާރު ޖާގައެއް ނެތް ކަމަށް ޑެންމާކްގެ ބޮޑުވަޒީރު މާކް ރުއްތޭ ވިދާޅުވެއްޖެ އެވެ.

މާކް މިހެން ވިދާޅުވެފައި ވަނީ ހަންގޭރީގައި އެއްޖިންސުން ގުޅުން ހިންގުމަށް ހިތްވަރުދޭ އެއްވެސް ފިލާވަޅެއް އެ ގައުމުގެ ތަޢުލީމީ މުގައްރަރުގައި ހިމެނުން މަނާކޮށް ގާނޫނު ހަދާ މަޖިލީހުން މައްސަލަ ބޮޑު ގާނޫނެއް ފާސްކޮށްފައި ވަނިކޮށެވެ.

މި މަހުގެ ކުރީކޮޅު ފާސްކުރި މި ގާނޫނުގައިވާ ގޮތުން އެއްޖިންސުން ގުޅުން ހިންގުމަށް ނުވަތަ އެފަދަ ކަމަކަށް ހިތްވަރުދޭ އެއްވެސް ފިލާވަޅެއް ނުވަތަ ހަރަކާތެއް ހަންގޭރީގެ ތައުލީމީ މުގައްރަރުގައި ހިމެނުމަކީ ގާނޫނީ ގޮތުން ކުށެކެވެ.

މި ބިލާއެކު އިންސާނީ ހައްގުތަކަށް މަސައްކަތްކުރާ ޖަމާއަތްތަކުންނާއި އިދިކޮޅު ޕާޓީތަކުން ވަނީ ސަރުކާރަށާއި ގާނޫނު ހަދާ މަޖިލީހަށް ވަރަށް ބޮޑަށް ފާޑުކިޔާފަ އެވެ. އެ ގާނޫނު ފާސްކުރި ދުވަހު ވެރިރަށް ބުދަޕެސްޓްގެ މަގުމައްޗަށް ގިނަ ބަޔަކު ނިކުމެ ވަނީ މުޒާހަރާކޮށްފަ އެވެ.

މި ގާނޫނަކީ ހަންގޭރީގެ ލީޑަރު ވިކްޓާ އޯބަންގެ ޒާތީ ޚިޔާލު ފުޅަށް ހަދާފައިވާ ގާނޫނެއް ކަމަށް އިދިކޮޅު ފަރާތްތަކުން ދަނީ ތުހުމަތު ކުރަމުންނެވެ.

މި ގާނޫނާ ގުޅިގެން އީޔޫގެ 27 ގައުމުގެ ތެރެއިން 14 ގައުމު އެއްވެ، ނެރުނު ބަޔާނެއްގައި ވަނީ މި ގާނޫނާ ބެހޭގޮތުން ކަންބޮޑުވުން ފާޅުކޮށްފަ އެވެ. މިފަދަ ގާނޫނަކާއެކު ޔޫރަޕިއަން ޔޫނިއަންގެ މެމްބަރު ހުރިހާ ގައުމުތަކުގެ އަޣުލަބިއްޔަތު ލިބިއްޖެނަމަ އެ ޖަމިއްޔާއިން ހަންގޭރީ ބޭރު ކުރެވޭނެ އެވެ.

އެއް ޖިންސުން ގުޅުން ހިންގުމަށް ހިތްވަރުދިނުން މަނާކުރާ ގާނޫނު އަނބުރާ ގެންދަވާނެތޯ ސުވާލުކުރުމުން ހަންގޭރީގެ ލީޑަރު ވިދާޅުވީ ގާނޫނު ފާސްވެއްޖެ ކަމަށާއި އެހެންކަމުން އެ ގާނޫނު ތަންފީޒު ވެސް ކުރެވޭނެ ކަމަށެވެ.

ޔޫރީޕިއަން ޔޫނިއަންގެ ރައީސް އުރުސުލާ ވޮން ޑޭރު ލޭން ވެސް ވަނީ ހަންގޭރީގެ މި ގާނޫނު ކުށްވެރިކޮށް އެއީ ގާނޫނެއްގެ ގޮތުގައި ބަލައިގަތުމަށް ދެކޮޅު ހައްދަވާފަ އެވެ. -- ސީއެންއެން