ބިލްބޯޑް މިޔުޒިކް އެވޯޑްސް ބޭއްވުމަށް އެންމެ ދުވަހަކަށްވެފައި ވަނިކޮށް ހަފުލާގައި ޕާފޯމް ކުރާނެ ލަވަކިޔުންތެރިންގެ ލިސްޓަށް ހުނަރުވެރި ލަވަކިޔުންތެރިޔާ ބްރޭންޑީ ނޯވުޑް އިތުރުކޮށްފި އެވެ.

ބިލްބޯޑު އެވޯޑު ހަފުލާއަށް މުޅިން އާ ތަރި؛ ބްރޭންޑީ ހުށަހަޅާދިނުމަށް ނިންމާފައިވަނީ އޭނާގެ ކާމިޔާބު ލަވަތަކެއްކަމަށްވާ ބޯޑާލައިން އާއި އޯލްމޯސްޓް ޑަޒްންޓް ކައުންޓްގެ އިތުރުން ނޯ ޓުމޯރޯ އެވެ.

މިއަހަރުގެ ބިލްބޯޑު މިޔުޒިކް އެވޯޑްސްގައި ލަވަ ހުށައަޅާ އެހެން ފަންނާނުންގެ ތެރޭގައި އެލީޝިޔާ ކީޒް، ބޭޑް ބަނީ، ލޫކް ކޯމްބްސް އަދި ޕޯސްޓް މެލޯން އާއި ޑެމީ ލޮވާޓޯ ހިމެނެ އެވެ. ވާދަވެރި ނޮމިނޭޝަންތަކެއް އިއުލާންކޮށްފައިވާ މިހަފުލާގެ އެންމެ ކުރީގައި އުޅެނީ 16 ނޮމިނޭޝަނާއި އެކު ޕޯސްޓް މެލޯން އެވެ.

ކޮވިޑް 19 އާއި ގުޅިގެން މިއަހަރު ނުބާއްވާނެ ކަމަށް ކުރިން އިއުލާންކުރި މިހަފްލާ، މިހާރު ތާވަލު ކޮށްފައިވަނީ މާދަމާ ރެއަށެވެ. ފާއިތުވެ ދިޔަ ދެ އަހަރެކޭ އެއްފަދައިން މިއަހަރުގެ އެވޯޑު ހަފުލާ ވެސް ހޮސްޓުކުރުމަށް ކަނޑައަޅާފައިވަނީ ލަވަ ކިޔުންތެރިޔާ ކެލީ ކްލާކްސަން އެވެ. އެމެރިކަން އައިޑަލް ސީޒަން 1 ކާމިޔާބުކޮށް މަޝްހޫރުކަން ހޯދާފައިވާ ކެލީ، މިފުުރުސަތާ ބެހޭގޮތުން ބުނެފައި ވަނީ ބިލްބޯޑު އާއިލާއާއެކު ވެވޭތީ އުފާކުރާ ކަމަށެވެ. އަދި މިޔުޒިކީ ފަންނާނުންގެ މަސައްކަތްތައް ފާހަގަކުރާ އިވެންޓެއްގެ ހިއްސާއަކަށް ވެވޭތީ ވަރަށް ހިތްހަމަޖެހޭ ކަމަށާއި މިއީ ކޮންމެހެން ވެސް ބަލަންވާނެ ހަފުލާއެއް ކަމަށް އޭނާ ބުންޏެވެ.