ގަލޮޅުން 20 އުޅަނދު، މައްޗަންގޮޅިން 43 އުޅަނދު، ހެންވޭރުން 34 އުޅަނދު އަދި މާފަންނުން 62 އުޅަނދު ނައްތާލަންޖެހޭ.

މާލޭގެ މަގުތަކުގައި ހުރި ދުވަސްވީ އުޅަނދުތައް ނެގުމުގެ މަސައްކަތް މާލެ ސިޓީ ކައުންސިލުން ފަށައިފި އެވެ.

މާލެ ސިޓީ ކައުންސިލުން ބުނީ، މަގުތަކުގައި ހުރި ނުދުއްވާތާ ގިނަދުވަސްވީ އުޅަނދުތަކާއި ހަލާކުވެގެން ނުނަގައި ގިނަ ދުވަސްވަންދެން ބަހައްޓާފައިހުރި އުޅަނދުތައް ނެގުމުގެ މަސައްކަތް މިއަދު ފަށާފައިވާ ކަމަށެވެ. މި ގޮތުން ހަތަރު ފޮރޮޅުޅީ އުޅަނދުތައް ނެގުމުގެ މަސައްކަތް ފަށާފައި ވަނީ މައްޗަންގޮޅި ފާށަނާކިލެގެފާނުމަގުންނެވެ. އަދި ދެ ފުރޮލުލީ އުޅަނދުތައް ނަގަން ފަށާފައި ވަނީ، މައްޗަންގޮޅި ނިކަގަސްމަގުންނެވެ.

މާލެ ސިޓީ ކައުންސިލުން ބެލި ބެލިއިރު ގަލޮޅުން 20 އުޅަނދު، މައްޗަންގޮޅިން 43 އުޅަނދު، ހެންވޭރުން 34 އުޅަނދު އަދި މާފަންނުން 62 އުޅަނދު ނައްތާލަންޖެހޭ ކަމަށް ފާހަގަކުރެވިފައިވާ ކަމަށެވެ.

މާލެ ސިޓީ ކައުންސިލުން ބުނީ، މާލޭސިޓީގެ މަގުމަތީގައި ހިނގާ ބިނގާވެއުޅޭ ފަރާތްތަކާއި، ވެހިކަލް ދުއްވާ ފަރާތްތަކަށް ދަތިވާގޮތަށް ބަހައްޓާފައި ހުންނަ އެއްގަމު އުޅަނދު ފަހަރާއި އަދި ހަލާކުވެ، ނުދުއްވާ ހުންނަތާ ގިނަދުވަސްވެފައިވާ އުޅަނދު ފަހަރު މި މަސައްކަތުގެ ދަށުން ނަގާނެ ކަމަށެވެ

މާލެސިޓީ ކައުންސިލުން ބުނީ، އުޅަނދު ފަހަރުގެ ވެރިފަރާތުން ނުނަގާ ހުންނަ އެއްގަމު އުޅަނދުފަހަރު "އެއްގަމު އުޅަނދު ޕާކު ކުރުމުގެ ގަވައިދު "ގެ ދަށުން ނަގައި ނައްތާލާ ގޮތަށް ހަމަޖެހިފައިވާ ކަމަށެވެ. މި ގޮތަށް ނެގުމުގައި އުޅަނދާއި ތަކެއްޗަށް ލިބޭ ގެއްލުމާއި އެ އުޅަނދަކުން މަދުވާ ބާވަތްތަކަށް ސިޓީ ކައުންސިލުން ޒިންމާ ނުވާނެ ކަމަށް ސިޓީ ކައުންސިލުން ބުނެ އެވެ.

މި މަސައްކަތް ކުރިއަށް ގެންދަނީ، ފުލުހުންނާ ގުޅިގެން އަމަލީ ގޮތުން ފުލުހުންގެ ބައިވެރިވުމާއެކު އެވެ.