ލޯބީގެ ފިލްމަށް ލޯބިކުރާ މީހުންގެ މެދުގައި އެންމެ ނަން ހިގާ އެއް ފިލްމް؛ ކުޗް ކުޗް ހޯތާ ހޭ ރިލީސްކުރިތާ 22 އަހަރު ފުރުން ވަރަށް ހާއްސަކޮށް ފާހަގަކޮށްފި އެވެ. މި މުނާސަބަތާ ގުޅޭގޮތުން ފޭނުންގެ ތަހުނިޔާ މެސެޖު ފޮނުވުމާއި ޝުއޫރު ފާޅުކޮށް ފިލްމުގައިވާ މަޝްހޫރު ޑައިލޮގްތައް ޓުވިޓާގައި "ކުޗް ކުޗް ހޯތާ ހޭއަށް 22 އަހަރު ފުރުން" ހޭޝްޓެގްކޮށް ދަނީ ޓްރެންޑު ކުރަމުންނެވެ.

ގިނަ އެވޯޑްތަކެއް ހާސިލްކުރި މިފިލްމުގެ ޑައިރެކްޓަރ ކަރަން ޖޯހަރާއި ފިލްމުގައި ފެނިގެންދިޔަ ތަރިން ވެސް މި ޓްރެންޑިންގައި ވަނީ ބައިވެރިވެފަ އެވެ. އެގޮތުން އެންމެ ތަފާތު ޕޯސްޓަކަށް ފާހަގަވެފައިވަނީ ފިލްމުގައި މައި އަންހެން ލީޑް ކުޅެފައިވާ ކާޖަލް، ފިލްމުގެ ހަދާން އާ ކުރަމުން ލާފައިވާ ވީޑީޔޯތަކެވެ. އޭގައި ފެނިގެންދަނީ ފިލްމުގެ ތިން މަންޒަރެއް ކާޓޫނުކޮށް ފިލްމުގެ ޑައިލޮގް ކޮޅު އަޅާފައިވާ ތަނެވެ.

https://www.instagram.com/p/CGZGU7tJse-/

ދަރުމާ ޕްރޮޑަކްޝަންސް އިން ތިނެސްކަން ލޯބީގެ ވާހަކައަކަށް އުފައްދާފައިވާ މިިފިލްމަކީ ކާމިޔާބު ޑައިރެކްޓަރު ކަރަން ޖޯހަރު ޑައިރެކްޝަނަށް ނުކުތް ފިލްމެވެ. މިކަމާ ގުޅޭގޮތުން ކަރަންގެ އިހުސާސްތައް ކިޔާދެމުން، އޭނާ ވަނީ ފިލްމުގައި "ލޯތްބަކީ ރަހުމަތްތެރިކަން" ކަމަށް ބުނާ ޑައިލޮގް ކޮޅާއި އެކު ވީޑިއޯކޮޅެއް ހިއްސާކޮށްފަ އެވެ. އަދި ފޭނުން މެދުކެޑުމެއްނެތި ފިލްމަށް ދެމުންގެންދާ ތަރުހީބަށް އޭނާ ވަނީ ހިތުގެ ފުންމިނުން ޝުކުރު އަދާކޮށްފައެވެ.