ވަޅިން ބިރުދައްކައިގެން ގިނަ އަދަދެއްގެ ފައިސާ ފޭރުނު މީހަކު ފުލުހުން ހައްޔަރުކޮށްފި އެވެ.

ފުލުހުން އޭނާ ހައްޔަރުކޮށްފައި ވަނީ މީހަކަށް ތޫނު ވަޅިއަކުން ބިރުދައްކައިގެން 90،000 އަށްވުރެ ގިނަ ރުފިޔާ ފޭރުމާ ގުޅިގެންނެވެ.

އެ މައްސަލައާ ގުޅިގެން ހައްޔަރުކޮށް ފުލުހުންގެ ބެލުމުގެ ދަށަށް ގެންގޮސްފައި ވަނީ ގ. ހިޔަރޯދި، މުހައްމަދު ޝައްމާން ސަލީމް އެވެ.

މި މައްސަލައާ ގުޅިގެން ކްރިމިނަލް ކޯޓުން ވަނީ އޭނާ ބަންދުގައި ބަހައްޓައިގެން މައްސަލަ ކުރިޔަށް ގެންދިއުމަށް 10 ދުވަހުގެ މުއްދަތެއް ޖަހާފަ އެވެ.

ފުލުހުން ބުނިގޮތުގައި ފޭރުނު މައްސަލައިގައި ހައްޔަރުކުރެވުނު ޝައްމާންއަކީ ކުށުގެ ގިނަ ރެކޯޑުތަކެއް ހުރި މީހެކެވެ. އެގޮތުން އޭގެ ތެރެއިން ވެސް ގިނައީ ފޭރުމުގެ މައްސަލަތައް ކަމަށް ވެސް ފުލުހުން ވަނީ ބުނެފަ އެވެ.

ފޭރުމުގެ މައްސަލައެއްގައި އެންމެ ފަހުން އޭނާ ފުލުހުންގެ އިދާރާއަށް ހާޒިރުކުރި މައްސަލައިގެ އިތުރުން ވެސް، ގިނަ ބަޔަކު ޝާމިލުވެގެން ފޭރުނު މައްސަލައެއްގައި ވެސް އޭނާ ހިމެނޭކަން ފުލުހުން ވަނީ ފާހަގަކޮށްފަ އެވެ.

ފުލުހުން ބުނީ މި މައްސަލަ އިތުރަށް ބަލައި ތަހުގީގު ކުރަމުން ގެންދާނެ ކަމަށެވެ.