އިބްރާހިމް އާގިލް، މަރާލި މައްސަލައިގެ މިއަދު ތާވަލުކުރެވިފައިވާ ޝަރީއަތުގެ އަޑުއެހުން ކެންސަލްވެއްޖެ އެވެ.

ގދ. ފަރެސްމާތޮޑާ، ކޮކާ، އާގިލް މަރާލި މައްސަލައިގެ އަޑުއެހުމެއް ކްރިމިނަލް ކޯޓުގައި ތާވަލްކޮށްފައިވާއިރު، މި މައްސަލަ ބެލުމަށް އަޑުއެހުމެއް ކްރިމިނަލް ކޯޓުން ކުރިއަށް ގެންދިއުމަށް ތާވަލުކޮށްފައިވަނީ މިއަދު ހެނދުނު 9:00 އަށެވެ.

އެހެން ނަމަވެސް މައްސަލައިގައި ދައުވާލިބޭ އެއް ފަރާތްކަމަށްވާ ހަމްދޫން ބަލިވުމުގެ ސަބަބުން މިއަދުގެ އަޑުއެހުން ވަނީ ކެންސަލްކޮށްފަ އެވެ. އަދި އެކަން މޯލްޑިވްސް ކަރެކްޝަނަލް ސާވިސަސްއިން ވަނީ ކްރިމިނަލް ކޯޓަށް އަންގާފަ އެވެ.

މި މައްސަލައިގައި ހަމްދޫންގެ މައްޗަށް ދައުވާކޮށްފައި ވަނީ ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ކުށުގެ ދައުވާ އެވެ.

އޮގަސްޓް 31، 2018 ވަނަ ދުވަހު ތޫނު އެއްޗަކުން ހަމަލާދީ މި ޒުވާނާ މަރާލާފައިވާއިރު، އޭނާ މަރުވީ އޭޑީކޭ ހޮސްޕިޓަލުގައި ފަރުވާދެމުން ގެންދަނިކޮށް އެރޭގެ އިރާކޮޅުގެ ވަގުތެއްގަ އެވެ.

މި މައްސަލައަށް ތިން އަހަރަށް ދިގުލައިގެން ދިއުމާއި ގުޅިގެން، ކްރިމިނަލް ކޯޓުން ވަނީ މި މަހުގެ ތިންވަނަ ދުވަހާއި 17 ވަނަ ދުވަހުގެ އިތުރުން އަންނަ ނޮވެމްބަރު މަހުގެ ހަތަރުވަނަ ދުވަހު އަޑު އެހުންތައް ބާއްވަން ތާވަލްކޮށްފަ އެވެ.

މީގެ އިތުރުން ޑިސެމްބަރު މަހުގެ 13 ވަނަ ދުވަހު މި މައްސަލައިގައި ހުކުމް އިއްވުމަށް ވެސް ކްރިމިނަލް ކޯޓުން ނިންމާފައިވެ އެވެ.