ރައްޔިތުން މަޖިލީހުގެ ހިތަދޫ އުތުރު ދާއިރާގެ މެމްބަރު މުހައްމަދު އަސްލަމްގެ ގޭގައި އަލިފާން ރޯކޮށްލުމަށް ބަޔަކު މަސައްކަތްކޮށްފި އެވެ.

ސ. ހިތަދޫގައި ހުންނަ މެމްބަރު އަސްލަމްގެ އަނބިކަނބަލުން ދިރިއުޅުއްވާ ގޭގައި އަލިފާން ރޯކޮށްލަން މަސައްކަތް ކޮށްފައި ވަނީ ރޭގެ ވަގުތެއްގަ އެވެ.

މިގޮތުން އޭނާގެ ގެ ރޯކޮށްލަން މަސައްކަތްކުރި މީހުން ވަނީ ގޭގެ ދޮރަށް ތެޔޮ އެޅުމަށް ފަހު އަލިފާން ރޯކޮށްލާފަ އެވެ. އެހެން ނަމަވެސް އެވަގުތު ވާރޭ ވެހުމުގެ ސަބަބުން އަލިފާންގަނޑު ވަނީ ބޮޑަށް ރޯނުވެ ނިވިފަ އެވެ.

މެމްބަރު އަސްލަމްގެ ގޭގައި ރޯކޮށްލަން ބަޔަކު މަސައްކަތްކޮށްފައި ވަނީ ރައްޔިތުން މަޖިލީހުގެ ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް އާއި މެމްބަރު އަސްލަމްއާއި ދެމެދުގައިވެސް މައްސަލައެއް ފެންމަތިވެފައި ވަނިކޮށެވެ. އެގޮތުން މެމްބަރު ނާޒިލް މެންބަރު އަސްލަމަށް ޖިންސީ ގުނަވަން ދެއްކި މައްސަލައެއް ރައްޔިތުންގެ މަޖިލީހަށް ހުށަހަޅާފައިވެ އެވެ.

ރޭގެ ވަގުތެއްގައި ހިނގައިދިޔަ މިހާދިސާއާއި، ހިތަދޫ އަށް ނިސްބަތްވާ މިދެ މެމްބަރުންގެ މެދުގައި ޖެހިފައިވާ މައްސަލައާ އެއްވެސް ގުޅުމެއްވާކަމުގެ ހެއްކެއް ނުލިބުމާއެކު މިދެ މައްސަލާގައި ގުޅުމެއް ވާކަމަށް ކަށަވަރުވެފައެއް ނުވެ އެވެ.