އަނިޔާވެރި ގޮތަކަށް މިމަހުގެ 14 ވަނަ ދުވަހު އދ. ދަނގެތީގައި މަރާލާފައި އޮއްވައި ފެނުނު މަހުމޫދުގެ ފޯނު ހޯދި ގޮތް ފުލުހުން ހާމަކޮށްފި އެވެ.

ރަހުމުކުޑަ ގޮތަކަށް މަރާލާފައި އޮތް މަހުމޫދުގެ ގާތިލު ހޯދައި ހައްޔަރުކޮށްފައިވާއިރު، އޭނާގެ ބަންދަށް 15 ދުވަސް ޖަހައި މިހާރު ވަނީ އދ. މަހިބަދޫއަށް ގެންގޮސްފަ އެވެ.

މި މައްސަލަ އާއި ގުޅިގެން ބިދޭސީ މީހާ ދިރިއުޅުނު ގެ ބަލައި ފާސްކުރިއިރު މަހުމޫދުގެ ފޯނު ހޯދާފައި ވަނީ ވަޅުލާފައި އޮއްވައި ކަމަށް ފުލުހުން ވަނީ ބުނެފަ އެވެ.

ފުލުުހުން މިއަދު ނެރުނު ބަޔާނުގައި ބުނީ މި މައްސަލައާއި ގުޅިގެން ހައްޔަރުކޮށްފައިވާ ބިދޭސީ މީހާގެ ގެއިން މަހުމޫދު މަރާލި މައްސަލައާ ގުޅޭ ބައިވަރު ހެކިތައް ވަޅުލާފައި ހުއްޓައި ހޯދާފައިވާ ކަމަށެވެ. އަދި ފުލުހުން ދަނީ އެ ތަކެތި މިހާރު ތަހުލީލު ކުރަމުން ކަމަށާއި، ހޯދި ތަކެތީގެ ތެރޭގައި މަހުމޫދުގެ ފޯނުގެ އިތުރުން މަހުމޫދު މަރާލި ދުވަހު ގާތިލް ލައިގެން ހުރި އަންނައުނާއި، މަހުމޫދުގެ އައިޑީ ކާޑު ހިމެނޭ ކަމަށް ވެސް ފުލުހުން ވަނީ ބުނެފަ އެވެ.

އަނިޔާތަކެއް ދިނުމަށްފަހު މަހުމޫދު މަރާލާފައިވާއިރު، އޭނާގެ ހަށިގަނޑުގެ އެކި ތަންތަނަށް ހަމަލާދީފައިވާ ކަމަށާއި އެގޮތުން ނިތްކުރި، ކަންފަތް އަދި ކަރަށް ވަޅިން އެކި ވަރުގެ އަނިޔާ ދީފައިވާ ކަމަށް އާއިލާއިން ބުންޏެވެ.

މަހުމޫދަކީ އެ ރަށުގައި ކާޑުގެ ވިޔަފާރި އާއި ހޮޓަލެއް ހިންގާ ވިޔަފާރިވެރި އެކެވެ. އެ ރަށު މީހުން ތުހުމަތު ކުރާގޮތުގައި މަހުމޫދު މަރާލީ ފައިސާގެ މައްސަލައެއްގަ އެވެ.