އަލަށް އާބާދުވާން ފަށާފައިވާ ހުޅުމާލޭގެ ދެވަނަ ފިހަވައްސަށް ދިރިއުޅުން ބަދަލުކޮށްފައިވާ އާއިލާތަކުގެ ކިޔަވާ ދަރިވަރުން މާލޭގައި ކިޔަވައިދޭ ސްކޫލްތަކަށް ދެވޭނެ އިންތިޒާމް ހަމަޖައްސާނެކަމަށް އެޑިއުކޭޝަން މިނިސްޓްރީން ބުނެފި އެވެ.

މިކަމާއި ގުޅޭގޮތުން މިނިސްޓަރު އާއިޝަތު އަލީ ވަނީ މިއަދު ރައްޔިތުންގެ މަޖިލީހުގެ ޖަލްސާގައި ހުޅުމާލެ ދާއިރާގެ މެމްބަރު އަލީ ނިޔާޒު ކުރެއްވި ސުވާލަކަށް ޖަވާބު ދެއްވާފަ އެވެ.

މެމްބަރު އަލީ ނިޔާޒު ވަނީ ދެވަނަ ފިޔަވަހީގައި ސްކޫލްތައް އެޅެންދެން ދަރިވަރުންނަށް ކިޔެވުން ކުރިއަށް ގެންދިއުމަށް އޮތް އިންތިޒާމަކީ ކޮބައިތޯ މިނިސްޓަރާ ސުވާލުކުރައްވާފަ އެވެ. އެ ސުވާލަށް ޖަވާބުދެއްވަމުން މިނިސްޓަރު ވިދާޅުވީ އެ ފުރުސަތު ހޯދައިދިނުމަށްޓަކައި ދަރިވަރުންގެ ޖާގަ އިތުރުކުރުމުގެ މަސައްކަތް ކުރަމުން އަންނަ ކަމަށެވެ. އަދި އެއް ދަންފަޅިއަށް ކިޔަވައިދޭ ހުރަވީ ސްކޫލް ދެ ދަންފަޅިއަށް ބަދަލުކޮށް ކިޔެވުން ކުރިއަށް ގެންދިއުމާއި ގުޅިގެން މަޝްވަރާ ކުރައްވަމުން ގެންދަވާ ކަމަށް ވެސް ޑރ. އައިޝަތު ވަނީ ވިދާޅުވި އެވެ.

އެގޮތުން ހިޔާ ފްލެޓް ތަކުގައި ދިރިއުޅޭ ދަރިވަރުންގެ ތެރެއިން ބައެއް ދަރިވަރުންނަށް ހުޅުމާލޭގެ ސްކޫލްތަކުން ޖާގަ ނުލިބޭކަން ފާހަގަކުރައްވައި އެޑިއުކޭޝަން މިނިސްޓަރު ވިދާޅުވީ އެ ދަރިވަރުންނަށް ކިޔެވުން ކުރިއަށް ގެންދެވޭނެ ނިޒާމެއް އެކުލަވާލުމުގެ އިތުރުން ހުރަވީ ސްކޫލުން ވެސް 1،500 ޖާގަ ލިބޭނެ ކަމަށެވެ.

އޭގެ އިތުރުން މިނިސްޓަރު ވަނީ ހުޅުމާލެ ދެވަނަ ފިޔަވަހީގައި ސްކޫލްތައް އެޅުމުގެ މަސައްކަތް ހަލުވި ދުވެއްޔެއްގައި ކުރިިއަށްދާ ކަމަށް ވިދާޅުވެފަ އެވެ.