ފައިވާނަށާއި ފުރަގަސްފަރާތަށް ލައިގެން މަސްތުވާތަކެތި އެތެރެކުރަން މަސައްކަތްކުރި ބަޔަކު ހައްޔަރުކޮށްފި އެވެ.

މިތިން މީހަކު ރާއްޖެ އެތެރެކުރަން އުޅުނު މަސްތުވާތަކެތީގެ ބަރުދަނުގައި މުޅި ޖުމްލަ 2445 ގުރާމު ހުރިއިރު، ފުލުހުން ވަނީ މި މައްސަލައިގައި ހައްޔަރުކުރި މީހުން ޝަރީއަތް ނިމެންދެން ބަންދުކޮށްދިނުމަށް ކްރިމިނަލް ކޯޓަށް އެދިފަ އެވެ.

މި މައްސަލައިގައި ފުލުހުން ހައްޔަރުކޮށްފައި ވަނީ ޕާކިސްތާނަށް ނިސްބަތްވާ އުމުރުން 41 އަހަރުގެ މުނީޒު އަޒީޒާއި، 36 އަހަރުގެ، ބުސްރާ އަނީސްގެ އިތުރުން 49 އަހަރުގެ މުހައްމަދު ޔަސީން އެވެ.

އެހެން ނަމަވެސް މައްސަލައިގައި ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން އެ މީހުންގެ ބަންދަށް ކޯޓުން ދީފައި ވަނީ 15 ދުވަހެވެ.

މި މައްސަލައިގައި ހައްޔަރުކުރި ޔާސީންގެ ފައިވާނުން 738 ގުރާމުގެ ހެރޮއިން ފެނިފައިވެ އެވެ. އަދި ފުރަގަސްފަރާތުން ނެގި ތިން ބުލެޓެއްގެ ތެރެއިން 254 ގުރާމް ހެރޮއިން ފެނިފައިވެ އެވެ. ބުސްރާ އަނީސްގެ ފައިވާނާއި ޖަންގިޔާ ތެރެއިން ނެގި ތަކެތީގެ ތެރޭގައި ހިމެނެނީ 852 ގްރާމްގެ ހެރޮއިން އެވެ. އަދި މުނީޒު ފައިވާނުން 598 ގުރާމުގެ ހެރޮއިން ހޯދާފައިވެ އެވެ.

މި މައްސަލައިގައި ހައްޔަރުކުރި މުނީޒަކީ މީގެ ކުރިން ދެ ފަހަރެއްގެ މަތިން ރާއްޖެއަށް މަސްތުވާތަކެތި އެތެރެކުރަން މަސައްކަތްކުރި މީހެކެވެ.