ޕާކިސްތާނުގެ އެކްޓަރެއް ކަމަށްވާ މާހިރާ ޚާން ބޮލީވުޑްގައި މަޝްހޫރުކަން ހޯދައި ވިދާލީ ފިލްމު "ރައީސް" އިންނެވެ.

އެހެންނަމަވެސް، މާހިރާ ބޮލީވުޑްގެ ފިލްމުތަކުން މިހާރު ނުފެންނައިރު، އޭނާ ދަނީ އަދިވެސް ޕާކިސްތާނުގެ ފިލްމުތަކުގައި މަސައްކަތް ކުރަމުންނެވެ.

މިކަމާއި ގިނަ ބަޔަކު ސުވާލު އުފައްދާއިރު، އޭނާ މިހާރު ބޮލީވުޑްގެ ފިލްމުތަކުން ނުފެންނަ ސަބަބު ބެލުމަށް ގިނަ ބަޔަކު ބޭނުންވެ އެވެ.

އިންޑިޔާ އާއި ޕާކިސްތާނުގެ މެދުގައި ހިނގާ ހަމަނުޖެހުންތަކުގެ ވާހަކަތަކަކީ މެދުކެނޑުމެއްނެތި އަޑުއިވެމުންދާ ވާހަކަތަކެވެ. އެދެގައުމުގެ މެދުގައި އޮންނަ ހަމަނުޖެހުމުގެ ސަބަބުން، ޕާކިސްތާނުގެ ރައްޔިތުންނަށް އިންޑިޔާގައި މަސައްކަތް ކުރުމުގެ ގާނޫނު ވަނީ އިންތިހާއަށް ހަރުކަށިކޮށްފަ އެވެ.

މިސަބަބާއި، ގުޅިގެން މާހިރާއަށް އިންޑިޔާގައި ހުރެ، ބޮލީވުޑްގެ ފިލްމުތަކުގައި މަސައްކަތް ކުރުން ވެގެން ދިޔައީ ވަރަށް އުނދަގޫ ކަމަކަށެވެ.

އެހެންނަމަވެސް އިންޑިޔާގެ ނޫސްތަކަށް ދިން އިންޓަވިއުއެއްގައި މާހިރާ ބުނީ، ފިލްމު ރައީސް ރިލީޒްވުމަށް ފަހުގައި އޭނާ އަށް ވަރަށް ގިނަ ފުރުސަތުތައް ލިބުނުކަމަށެވެ. އަދި ބޮލީވުޑްގައި މަސައްކަތް ކުރުމަށްވެސް އޭނާ އެދޭކަމަށާއި، ދެގައުމުގެ މެދުގައި ހިނގާ ހަމަނުޖެހުމުގެ އަސަރު ފިލްމީ ތަރިންގެ ހަޔާތަށް ކުރާކަމަށްވެސް އޭނާ ބުނެފައިވެ އެވެ.