ރާއްޖޭގައި އިންޑިއާ ސިފައިންނަށް ގާއިމްވެ، ތިބުމަށް ފުރުސަތު ދީގެން މި ސަރުކާރުން ހަދާފައިވާ އަސްކަރީ އެއްބަސްވުންތައް ހާމަކުރުމުގެ ސަބަބުން ސަރުކާރު ނިމުމަކަން އަތުވެދާނެ ކަމަށް ކުރީގެ ރައީސް ޔާމީން ވިދާޅުވެއްޖެ އެވެ.

ރައީސް ޔާމީން މިއަދު ކުރެއްވި ޓުވީޓެއްގައި ވިދާޅުވީ އިންޑިއާ ސިފައިން ރާއްޖޭގައި ގާއިމްވެގެން ތިބުމުގެ ފުރުސަތު ފަހިކޮށްދޭ އެއްބަސްވުންތައް ހޯދުމަށް ރައްޔިތުން ކަމާއިބެހޭ އިދާރާތަށް ފަހަތުން ދުވަމުން ދާކަމަށެވެ. އެކަމަކު އޮޅުވާލާފައިވާ އެއްބަސްވުންތަކެއް ސަރުކާރުން ހާމަކޮށްފާނެތޯ އެމަނިކުފާނު ވަނީ ސުވާލު ކުރައްވާފަ އެވެ. އަދި ކުރެވެމުންދާ މަސައްކަތްތަކުގެ ސަބަބުން ސަރުކާރުގެ ފަރާތުން ދައްކަމުންދާ ހަމަނުޖެހޭ ވާހަކަތައް ހުއްޓުވުމަކަށް ގެނެވިގެންދާނެ ކަމަށް ހީކުރައްވާ ކަމަށް ވެސް އެ މަނިކުފާނުވަނީ ވިދާޅުވި އެވެ.

"ރާއްޖޭގައި އިންޑިއާގެ ސިފައިން ތިބުމަށް ފުރުސަތު ފަހިކޮށްދީފައިވާ ސިއްރު އެއްބަސްވުންތައް ހޯދުމަށް ރައްޔިތުން އަންނަނީ އިދާރާތައް ފަހާ ދުވަމުން. އޮޅުވާލާފައިވާ އެއްބަސްވުމެއް ހާމަކޮށްފާނެތޯ ފުންކޮށް ވިސްނާލަން ޖެހޭ. ވަރަށް އުނދަގޫ, އަދި ގިނަ ދުވަސް ހޭދަވެދާ މަސައްކަތަކަށް ވީނަމަވެސް, މީގެ ނަތީޖާއަކަށް ވެގެންދާނީ ސަރުކާރު އިނދަޖެހުން،" ޔާމީން ވިދާޅުވި އެވެ.

ރާއްޖޭގެ އެކި ކަންކޮޅު ތަކުގައި އިންޑިއާގެ ސިފައިން ގާއިމްވެތިބޭ ކަމަށާއި ސަރުކާރު ވަނީ އިންޑިޢާގެ ދަށުވެފައި ކަމަށް ބުނެ، އިންޑިއާ ސިފައިން ބޭލުމަށް ގޮވާލާ ކުރިޔަށް ގެންދާ "އިންޑިއާ އައުޓް" ހަރަކާތަށް މިހާތަނަށް ރާއްޖޭގެ އެކި ކަންކޮޅުތަކުން ބޮޑު ތަރުހީބެއް ވަނީ ލިބިފައެވެ.

އެހެންނަމަވެސް ސަރުކާރުން ވަނީ އެ ހަރަކާތް ކުރިޔަށް ނުގެންދެވޭނެކަން އަންގާ "އިންޑިއާ އައުޓް" ކިޔުން މަނާކޮށްފަ އެވެ.

ރައީސް އިބްރާހިމް މުހައްމަދު ސޯލިހް ވަނީ ރިޔާސީ ގަރާރެއް ނެރުއްވާ އެ ހަރަކާތުގެ ސަބަބުން ގައުމީ ސަލާމަތަށް ނުރައްކާވާ ކަމަށް ކަނޑައަޅާ، ހަރަކާތް ހުއްޓުވަން ސަލާމަތީ ބާރުތަކަށް އަންގާފަ އެވެ. އަދި "އިންޑިއާ އައުޓް" އާއި ދެކޮޅަށް ސަރުކާރާއި އެމްޑީޕީން ވަނީ "ބާކީނުވޭ" ނަމުގައި ކެމްޕޭނެއް ފަށާފަ އެވެ.

ނަމަވެސް އެމްޑީޕީން އިސްވެ ފެށި "ބާކީނުވޭ" ހަރަކާތައް މާބޮޑު ތަރުހީބެއް ލިބިފައެއް ނުވެ އެވެ. އެ ހަރަކާތުގައި ބައިވެރިވެފައިވަނީ އެމްޑީޕީގެ ސިޔާސީ މަގާމުތަކުގައި ތިބި މީހުން އެކަންޏެވެ.