އެއްޖިންސުން ގުޅުން ހިންގާ ލިވާތުކުރި ކަމުގެ ތުހުމަތުގައި ހައްޔަރު ކުރި، ކުރީގެ ރައީސް މުހައްމަދު ނަޝީދުގެ ކޮއްކޮ އަހްމަދު ނާޒިމް އަބްދުއްސައްތާރުގެ ސުލޫކީ މައްސަލަ ބެލެން ނެތް ކަމަށް ބާ ކައުންސިލުން ނިންމައިފި އެވެ.

ނާޒިމް ސައްތާރުގެ ސުލޫކީ މައްސަލަ ބާ ކައުންސިލަށް ހުށައެޅީ ގާނޫނީ ވަކީލު އަހުމަދު ތާލިބެވެ. އޭނާ ހުށަހެޅި މައްސަލައިގައި އެދުނީ ދައުރުވަމުންދާ ވީޑިއޯ އާއި ގުޅިގެން ގާނޫނީ ވަކީލުންނާއި ދޭތެރޭ އަދި ބާ ކައުންސިލާއި ދޭތެރޭ އާންމުން ދެކޭ ގޮތް ބަދަލުވަމުންދާތީ އެ މައްސަލަ ބަލާ، ނާޒިމް ސައްތާރުގެ ވަކީލުގެ ކަމުގެ ހުއްދަ ވަގުތީ ގޮތުން ބާތިލުކޮށްދިނުމަށެވެ.

މި މައްސަލައާ ގުޅިގެން ބާ ކައުންސިލުން މިއަދު އަންގާފައި ވަނީ ރާއްޖޭގެ ގާނޫނީ ފަންނުގެ ގާނޫނުގެ 54 ވަނަ މާއްދާގައި ސުލޫކީ މައްސަލައެއް ބާ ކައުންސިލަށް ހުށަހެޅޭނީ ގާނޫނީ ވަކީލަކާއި ހަވާލުކުރާ މަސައްކަތަކާއި ގުޅިގެން އަމަލުކުރާ ގޮތެއްގެ ސަބަބުން ކަމަށެވެ.

ބާ ކައުންސިލުގެ އެ ނިންމުމުގައި ބުނެފައިވަނީ އެއްޖިންސުން ގުޅުންހިންގާ ވީޑިއޯތަކަކީ ސުލޫކީ މައްސަލައެއް ބެލިދާނެ ފަދަ ޝަކުވާއެއް ކަމަށް ބާ ކައުންސިލްގެ އެގްޒެކެޓިވް ކޮމެޓީއަށް ނުފެންނަ ކަމަށެވެ.

ލީކުވެފައިވާ ވީޑިއޯއިން ފެންނަނީ ނާޒިމް ސައްތާރާއި ބިދޭސީ ފިރިހެނަކު މާލޭގެ ގެއެއްގައި އެއްޖިންސުން ގުޅުން ހިނގާ މަންޒަރެވެ. ވީޑިއޯއިން އެއީ ނާޒިމް ސައްތާރުކަން ވަރަށް ސާފުކޮށް ފެންނަ ނަމަވެސް އޭނާ ވަނީ އެކަން ދޮގުކޮށްފަ އެވެ.

އެ ވީޑިއޯއާއެކު ނާޒިމް ހައްޔަރު ކުރުމަށާއި އޭނާގެ ގާނޫނީ ވަކީލުކަން ކުރުމުގެ ހުއްދަ އަތުލުމަށް ގިނަ ބަޔަކު ވަނީ ގޮވާލާފަ އެވެ.