ބޮލީވުޑްގެ މަގުބޫލު ބަތަލާ އާލިއާ ބަޓް "ގުޗީ" ބްރޭންޑްގެ އެމްބެސެޑަރަކަށް ހަމަޖައްސައިފި އެވެ.

މިއީ އިޓަލީގެ މަޝްހޫރު ފެޝަން ބްރޭންޑް ގުޗީގެ އެމްބެސެޑަރަކަށް އިންޑިއާގެ ފަންނާނެއް ހަމަޖެއްސި ފުރަތަމަ ފަހަރެވެ.

ގުޗީން ލިބުނު ފުރުސަތާ އެކީ އާލިއާ ގުޗީގެ އުފެއްދުންތައް އިންޑިއާގެ އިތުރުން އިންޓަނޭޝަނަލް މާކެޓް ވެސް އިޝްތިހާރުކޮށް ޕްރޮމޯޓްކުރާނެ އެވެ. އަދި ދުނިޔޭގެ އެކި ކަންކޮޅުތަކުގައި ބާއްވާ ގުޗީ އިވެންޓްތަކުގައި ވެސް އާލިއާ ދެން ބައިވެރިވާނެ އެވެ.

ގުޗީގެ އެމްބެސެޑަރަކަށް ހަމަޖެއްސުމާއި ގުޅިގެން އާލިއާ ބުނެފައިވަނީ މިބްރޭންޑް އިޝްތިހާރު ކުރުމަށް ލިބުމުން އުފާ ކުރާ ކަމަށެވެ.

އުމުރުން 30 އަހަރުގެ އާލިއާ ވަނީ ވޯޓް މަޖައްލާއިން އިންތިޒާމްކޮށްގެން ބާއްވާ ދުނިޔޭގެ އެންމެ ބޮޑު ފެޝަން އިވެންޓް ކަމަށްވާ މެޓް ގާލާގައި ވެސް ބައިވެރިވެފަ އެވެ.

ޖޭމީ ޑޯނަން އާއި ގާލް ގަޑޮޓްއާ އެކު ކުޅެފައިވާ އާލިއާގެ ފުރަތަމަ ހޮލީވުޑް ފިލްމު "ހާޓް އޮފް ސްޓޯން" ޕްރިމިއާ ކުރަން ހަމަޖެހިފައިވަނީ އަންނަ އޯގަސްޓު މަހު 11 ވަނަ ދުވަހު އެވެ.

އޭގެ އިތުރުން، މި މަހު 18 ގައި ނެރޭ ކަރަން ޖޯހަރްގެ "ރޮކީ އޯރް ރާނީ ކީ ޕްރޭމް ކަހާނީ" ފިލްމުގައި ވެސް އާލިއާ ފެންނާނެ އެވެ.