ޔޫރަޕްގެ އިއްތިހާދުން ބާއްވާ އީޔޫ އިންޑޯ ޕެސިފިކް މިނިސްޓަރުންގެ ފޯރަމްގައި ބައިވެރިވެވަޑައިގެންނެވުމަށް ފޮރިން މިނިސްޓަރު އަބްދުﷲ ޝާހިދު ސްވިޑެންގެ ސްޓޮކްހޯމް އަށް ވަޑައިގަންނަވައިފި އެވެ.

މާދަމާގެ ނިޔަލަށް ކުރިއަށް ފޯރަމާ ގުޅޭގޮތުން މިނިސްޓަރު ޝާހިދު ވިދާޅުވީ މިފޯރަމާ ގުޅިގެން ދިވެހިރާއްޖެއާއި އިންޑޯ ޕެސިފިކް ސަރަހައްދާއި ޔޫރަޕްގެ އިއްތިހާދާ ދެމެދު އޮންނަ ގުޅުން އިތުރަށް ހަރުދަނާވެގެން ދާނެ ކަމަށެވެ.

އީޔޫ އިންޑޯ ޕެސިފިކް މިނިސްޓަރުންގެ ފޯރަމްގެ މަގްސަދަކީ އީޔޫ އާއި އިންޑޯ ޕެސިފިކް ސަރަހައްދުގެ ގުޅުން ވަރުގަދަކުރުމެވެ. އިންޑޯ ޕެސިފިކް ސަރަހައްދާއި އީޔޫގެ ގާތްގަނޑަކަށް 60 ފޮރިން މިނިސްޓަރުން މި ބައްދަލުވުމުގައި ބައިވެރިވެރވަޑައިގަންނަވާނެ އެވެ. އަދި އިންޑޯ ޕެސިފިކް ސަރަޙައްދީ ޖަމިއްޔާތަކުގެ މަންދޫބުންނާއި އެހެން ބައެއް މަންދޫބުން މި ފޯރަމްގައި ބައިވެރިވެވަޑައިގަންނަވާނެއެވެ.

މި ފޯރަމަކީ ދުނިޔޭގެ ތަރައްޤީއަށާއި، ސަރަހައްދުތަކަށް ކުރާ އަސަރު ވަޒަންކުރުމަށް މުހިންމު ޕްލެޓްފޯމެކެވެ.

ސްވިޑަންއަށް ވަޑައިގަތުމުގެ ކުރިން މިނިސްޓަރު ވަނީ ސާބިއާ އާއި ހަންގޭރީއަށް ރަސްމީ ދަތުރުފުޅުތަކެއް ކުރައްވާފަ އެވެ.