ފްރާންސްގެ މަގު މައްޗަށް މީހުން ނިކުމެ ހިންގަމުންދާ ހަމަނުޖެހުންތައް ކޮންޓްރޯލު ނުވެ ތިންވަނަ ދުވަހަކަށް ދިގުލައިގެން ދިއުމުގެ ސަބަބުން އެތެރޭގެ ދަތުރު ފަތުރުތައް ހުއްޓާލައި، 40،000 އޮފިސަރުން މަގުމައްޗަށް ނެރެފި އެވެ.

ފުލުހުން ބަޑި ޖަހައި 17 އަހަރުގެ ފިރިހެން ކުއްޖަކު މަރާލުމާ ގުޅިގެން އުފެދުނު ނުތަނަވަސްކަމުގައި އާންމުން މަގުމައްޗަށް ނުކުތީ މިދިޔަ އްނގާރަ ދުވަހު އެވެ.

އޭރުއްސުރެ ގިނަ އަދަދެއްގެ އަންނަނީ މަގުމަތީގައި ހަމަނުޖެހުން ހިންގަމުންނެވެ. ސަރުކާރުގެ އިމާރާތްތަކާއި ސިޓީ ކައުންސިލް ފަދަ ތަންތަނަށް ގެއްލުން ދިނުމުގެ އިތުރުން ގިނަ އަދަދެއްގެ ވެހިކަލްތަކާއި ބިލްޑިންތަކުގައި ވަނީ ރޯކޮށްލާފަ އެވެ.

ފްރާންސްގެ މަގުމަތީގައި ޒުވާނުން މުޒާހަރާ ކުރަނީ

ނާހީލް ނަމަކަށް ކިޔާ އެފްރިކާގެ ދަރިކޮޅަކަށް ނިސްބަތްވާ ޒުވާނާ ފުލުހުންގެ ބަޑިން މަރާލި ވީޑިއޯ އާންމުވުމާ އެކު ގިނަ އަދަދެއްގެ ޒުވާނުން މަގުމައްޗަށް ނިކުތީ ފުލުހުންގެ އެ އަމަލާ ދެކޮޅު ހެދުމަށެވެ.

ފުލުހުން ފުރަތަމަ ބުނީ ނާހީލްގެ ގަޔަށް ބަޑި ޖަހަން ޖެހުނީ އޭނާ ދުއްވި ވެހިކަލް ހުއްޓަން އަންގުމުން މަޑުނުކޮށް ދުއްވުމުން ކަމަށެވެ.

ނަމަވެސް ވީޑިއޯ ފުޓޭޖުން ފެންނަ ގޮތުގައި ފުލުހުންގެ ޗެކް ޕޮއިންޓެއްގައި ނާހީލް މަޑުކޮށްގެން ހުރެފައި ދުއްވާލަން އުޅުނު ވަގުތު ފުލުސް މީހާ ބަޑިޖެހީ އެވެ.

ފްރާންސްގެ މުޒާހަރާގެ ތެރެއިން

ބަޑި ޖެހި ފުލުހުންގެ މީހާ މިހާރު ވަނީ ހައްޔަރުކޮށް ތަހުގީގު ފަށާފަ އެވެ.

ފުލުސް އޮފިސަރުގެ އެ އަމަލު ގާނޫނީ ގޮތުން ހަތިޔާރު ބޭނުންކުރަން ޖެހޭފަދަ ހާލަތަކަށް ނުފެތޭކަމަށް އިދާރާތަކުން ބުނެ އެވެ.

އެހެންކަމުން އެ މައްސަލައިގެ ތަހުގީގުކުރެވެނީ ފުލުހުންގެ މީހާ ގަސްދުގައި މީހަކު މަރާލިކަމުގެ ކުށުގެ މައްޗަށް ބިނާކޮށެވެ.