އަވަސް މައްސަލައެއްގެ ގޮތުގައި ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ މައްސަލަ ބަލައިދިނުމަށް އިދިކޮޅު ޕީއެންސީގެ ރައީސް އަބްދުއްރަހީމް އަބްދުﷲ (އަދުރޭ) ގޮވާލައްވައިފި އެވެ.

ޕީޕީއެމްގެ އޮފީހުގައި ރޭ ބޭއްވި ޖަލްސާގައި ވާހަކަދައްކަވަމުން އަދުރޭ ވިދާޅުވީ ޔާމީނަކީ ދިވެހީންގެ ރިޔާސީ ކެންޑިޑޭޓް ކަމަށާއި އެމަނިކުފާނަށް އިންތިހާބުގައި ވާދަކުރުމުގެ ފުރުސަތު ހޯދައިދޭންޖެހޭ ކަމަށެވެ.

"އަޅުގަނޑު މި ދަންނަވާ ވާހަކައަކީ ވަކިގޮތަކަށް ހުކުމް ކުރުމެއް ނޫން. ހައިކޯޓުގައި އެ އޮތް މައްސަލަ އިންސާފުވެރިކަމާއެކު ނިންމައިދޭށޭ ކުރިމަތިލުމުގެ ފުރުސަތު ބަންދުވުމުގެ ކުރިން،" އަދުރޭ ވިދާޅުވި އެވެ.

އޭނާ ވިދާޅުވީ އިންސާފުވެރި ޝަރީއަތެއް ލިބިއްޖެނަމަ ޔާމީން ކޯޓުން ނުކުމެވަޑައިގަންނަވާނީ މައުސޫމް ބޭފުޅެއްގެ ގޮތުގައި ކަމަށެވެ. އަދި އެ ޝަރީއަތް އަވަސް ކުރުމަށް ސުޕްރީމް ކޯޓުން އިސްނަގައިދިނުމަށް އަދުރޭ އެދިވަޑައިގަތެވެ.

ވ. އާރަށުގައި ޓޫރިސްޓް ރިސޯޓެއް ތަރައްގީކުރުމަށް ދޫކުރި މުއާމަލާތާ ގުޅިގެން ޔާމީންގެ މައްޗަށް އުފުލި މަނީލޯންޑަރިން އާއި ރިޝްވަތުގެ ދައުވާ ސާބިތުވެ އެމަނިކުފާނަށް އިއްވީ 11 އަހަރުގެ ޖަލު ހުކުމެކެވެ.

ހައިކޯޓުގައި އޮތް އިސްތިއުނާފު މައްސަލަ މަޑުޖެހިފައި ވަނީ އެ މައްސަލަ ބައްލަވާ ފަނޑިޔާރުންގެ ބެންޗުގައި ހިމެނިވަޑައިގަންނަވާ ދެ ފަނޑިޔާރަކު ޗުއްޓީގައި ހުންނެވުމުގެ ސަބަބުންނެވެ.